Tronditje botërore nga ndarja nga jeta e Papa Françeskut, Serie A pezullon ndeshjet

Vdekja e Papa Françeskut ka tronditur mbarë opinionin publik ndërkombëtar, duke lënë pas një dhimbje të madhe që ka prekur çdo cep të botës. Në shenjë respekti dhe zie kombëtare, edhe bota e sportit, veçanërisht ajo e futbollit italian, ka reaguar menjëherë.

Të gjitha ndeshjet e parashikuara për të hënën në Serie A janë shtyrë fillimisht në një datë të pacaktuar, ndërsa Lega Serie A ka dalë me një njoftim zyrtar ku konfirmon se katër prej takimeve do të zhvillohen të mërkurën, më 23 prill, në orën 18:30. Bëhet fjalë për përballjet: Torino-Udinese, Cagliari-Fiorentina, Genoa-Lazio dhe Parma-Juventus.

Po të mërkurën do të zhvillohet edhe derbi i zjarrtë i “Madonnina”, Inter-Milan, në orën 21:00, ashtu siç ishte parashikuar fillimisht. Megjithatë, e ardhmja e javës së 34-të të kampionatit italian, e planifikuar të nisë të premten, mbetet ende e paqartë për shkak të ceremonive mortore që pritet të zhvillohen për Papën.

Italia pritet të mirëpresë liderë botërorë gjatë ceremonisë së homazheve dhe përcjelljes për në banesën e fundit, ku konfirmimin për pjesëmarrje e ka dhënë edhe ish-presidenti amerikan Donald Trump.

Situata më e vështirë pritet të godasë Interin, skuadër që është aktive në të gjitha garat – Serie A, Liga e Kampionëve dhe Kupa e Italisë – dhe çdo ndryshim në kalendar mund të sjellë një ngarkesë të konsiderueshme për zikaltërit në javët vendimtare të sezonit.