Britania godet rrjete të jashtëligjshme që shfrytëzojnë migrantët

Mbretëria e Bashkuar ka vendosur sot për herë të parë sanksione të posaçme ndaj trafikimit të paligjshëm të njerëzve, duke shënjestruar krerë bandash kriminale, ndërmjetës dhe furnizues pajisjesh për kontrabandimin e migrantëve nëpër rrugë të rrezikshme nga Azia, Ballkani dhe Afrika e Veriut.

Sanksionet përfshijnë ngrirjen e pasurive dhe llogarive bankare, ndalimin e veprimeve financiare me Mbretërinë e Bashkuar, ndalesa udhëtimi si dhe ndalimin për të qenë drejtues kompanish në territor britanik. Ato janë pjesë e planit qeveritar britanik “Plan for Change” dhe përbëjnë sanksionin e parë në botë të dedikuar posaçërisht për të luftuar trafikimin e njerëzve dhe krimin e organizuar të imigracionit.

“Ky është një moment historik në përpjekjet tona për të ndalur krimin e organizuar të imigracionit. Do t’i gjejmë trafikantët kudo që të jenë dhe do t’i bëjmë përgjegjës,” deklaroi Sekretari i Jashtëm britanik, David Lammy.

Kush janë të sanksionuarit?

Në listën e parë të të sanksionuarve janë përfshirë:

Bledar Lala, shqiptar, udhëheqës i një bande në Belgjikë që kontrabandon njerëz përmes Kanalit Anglez.

Alen Basil, ish-përkthyes policor në Serbi, i cili drejton një rrjet të dhunshëm kontrabande në bashkëpunim me zyrtarë të korruptuar.

Mohammed Tetwani, i njohur si “Mbreti i Horgos” në Serbi, i akuzuar për torturimin e refugjatëve që nuk paguajnë.

Kompania kineze Weihai Yamar Outdoors Product Co, e cila prodhon dhe shet varka të përdorura për trafikimin e migrantëve drejt Britanisë.

Grupet e përfshira ndërkombëtare:

Një rrjet i lidhur me Irakun, përfshirë Goran Assad Jalal, Hemin Ali Salih, Dedawan Dazey, Roman Ranyaye, Azad, Nuzad dhe Nihad Khoshnaw, të cilët kryejnë kontrabandë përmes kamionëve frigoriferikë dhe udhëtimeve detare të rrezikshme.

Menaxhues të sistemit informal të transferimit të parave Hawala, si Muhammed Khadir Pirot, Mariwan Jamal dhe Rafiq Shaqlaway.

Bandat nga Afrika e Veriut që operojnë në Ballkan, si Kazawi dhe Tetwani, të njohura për dhunë ndaj migrantëve që nuk kanë para.

Rrjete që prodhojnë pasaporta false në Ballkan, përfshirë bandat Kavač dhe Škaljari nga Mali i Zi dhe persona si Dalibor Ćurlik, Almir Jahović, Marko Petrović, Nikola Vein, Ratko Živković dhe Dejan Pavlović.

Masa ndëshkuese:

Të gjithë personat dhe entitetet e përfshira do t’i nënshtrohen:

Ngrirjes së pasurive dhe ndalimit të transaksioneve me subjekte britanike,

Ndalimit të hyrjes ose qëndrimit në territorin e Mbretërisë së Bashkuar,

Përjashtimit nga drejtimi i bizneseve në Britani.

Sanksionet janë miratuar në bazë të Ligjit për Sanksione dhe Pastrim Parash dhe janë pjesë e strategjisë “Stop, Sanction, Return” e Ministrisë së Jashtme britanike (FCDO), që synon të godasë rrjetet kriminale që përfitojnë nga njerëz në nevojë dhe të parandalojë migrimin e parregullt.

Ky veprim vlerësohet si një hap i rëndësishëm në bashkëpunimin ndërkombëtar për të goditur rrënjët financiare dhe logjistike të trafikimit të qenieve njerëzore.