Trump vendos tarifa të reja gjithëpërfshirëse: Goditen mbi 50 shtete, përfshirë Indinë, Kanadanë dhe BE-në
Tarifat e reja gjithëpërfshirëse të Presidentit të SHBA-së, Donald Trump, kanë hyrë në fuqi në mesnatë, duke goditur dhjetëra vende në mbarë botën. “ËSHTË MESNATA!!! MILIARDË DOLLARË NË TARIFAT PO RRJEDHIN TANI NË SHTETET E BASHKUARA TË AMERIKËS!”, shkroi Trump në rrjetet sociale pak minuta para afatit të fundit në Uashington, DC.
Administrata e tij ka përditësuar listën e re të tarifave, duke i dhënë afat vendeve deri më 7 gusht për të arritur marrëveshje me SHBA-në dhe për të shmangur taksat e reja të importit, të cilat Trump i cilëson si “tarifa reciproke”.
India është goditur me një tarifë prej 50%, që hyn në fuqi më 27 gusht, nëse nuk ndalon blerjen e naftës nga Rusia. Tajvani do të përballet me një tarifë 20%, ndërsa Bashkimi Evropian ka rënë dakord për një normë 15% mbi eksportet e veta në SHBA.
Ndër masat më drastike është paralajmërimi për tarifë 100% mbi të gjithë gjysmëpërçuesit (çipat) e prodhuar jashtë SHBA-së. Megjithatë, prodhues të mëdhenj si TSMC (Tajvan), SK Hynix dhe Samsung (Koreja e Jugut) do të përjashtohen për shkak të investimeve të mëdha në territorin amerikan.
Në Azinë Juglindore, Laosi dhe Mianmari janë goditur me tarifa deri në 40%, për shkak të lidhjeve të tyre të forta tregtare me Kinën. Ekspertët thonë se politika e re synon të riformësojë sistemin tregtar global në favor të SHBA-së, duke shënjestruar vendet që, sipas Trump, kanë përfituar padrejtësisht nga tregtia ndërkombëtare.
Kanadaja është përballur me një rritje të tarifave nga 25% në 35%, si ndëshkim për, sipas Trump, “dështimin për të frenuar rrjedhën e fentanilit dhe drogave të tjera në SHBA”. Megjithatë, shumica e eksporteve kanadeze do të përjashtohen falë marrëveshjes USMCA.
Brazilit i është vendosur një tarifë 50%, si reagim ndaj kritikave të Presidentit Lula da Silva për kompanitë amerikane të teknologjisë. Trump gjithashtu ka kritikuar ndjekjen penale të ish-presidentit Bolsonaro, duke e quajtur “gjueti shtrigash”.
Ndërsa disa vende si Mbretëria e Bashkuar, Japonia dhe Koreja e Jugut kanë arritur marrëveshje për tarifa më të ulëta, të tjerat janë ende në negociata të ethshme me Uashingtonin për të shmangur goditjet ekonomike që pritet të kenë pasoja globale.
