Sulm i ri rus ndaj Kievit: tetë të plagosur dhe dëme të shumta në qytet

Kryeqyteti ukrainas është goditur sërish nga një sulm ajror rus me raketa balistike, duke shkaktuar shpërthime të fuqishme, zjarre dhe disa të plagosur. Autoritetet njoftuan se sistemet e mbrojtjes ajrore janë aktivizuar menjëherë për të neutralizuar raketat që synonin qytetin.

“Kiev po sulmohet me raketa balistike. Sistemet e mbrojtjes ajrore janë në veprim”, deklaroi kreu i Administratës Ushtarake të Qytetit të Kievit, Tymur Tkachenko, duke u bërë thirrje banorëve të qëndrojnë në strehimore derisa situata të qartësohet.

Ndërkohë, kryebashkiaku i Kievit, Vitaliy Klitschko, konfirmoi përmes Telegramit se “qyteti është nën sulm balistik”, ndërsa raportohet se disa pjesë të qytetit janë përfshirë nga flakët.

Sipas të dhënave paraprake, si pasojë e sulmit janë plagosur tetë persona dhe është dëmtuar një çerdhe në rrethin e Dniprovsky. Shërbimet emergjente po punojnë për të shuar zjarret dhe për të eliminuar pasojat e goditjeve.

Forcat Ajrore të Ukrainës kishin paralajmëruar më herët për një rrezik të mundshëm të përdorimit të raketave balistike nga drejtimi verilindor.

Ky është sulmi i dytë i rëndë ndaj Kievit brenda pak ditësh. Gjatë natës së 22 tetorit, një tjetër sulm rus vrau dy persona dhe plagosi 30 të tjerë.