BQE: Familjet evropiane duhet të mbajnë para të gatshme për emergjenca
Banka Qendrore Evropiane (BQE) ka nënvizuar rëndësinë e parave të gatshme si mjet për përgatitjen kombëtare ndaj krizave, duke këshilluar familjet të mbajnë një shumë parash në shtëpi për raste urgjente.
Thirrja vjen pas praktikave të ngjashme në vende si Holanda, Finlanda dhe Austria, ku qytetarëve u rekomandohet të kenë 70-100 euro për person në para të gatshme. Suedia dhe Norvegjia kanë zbatuar programe të ngjashme.
BQE argumenton se sistemet digjitale mund të dështojnë në raste krizash, dhe thekson se qytetarët duhet të jenë të përgatitur me para, ushqim, ujë dhe ilaçe për të paktën 72 orë në rast të ndërprerjes së shërbimeve. Këshillat e këtij lloji janë nxitur nga përvoja e luftës në Ukrainë, pandemia Covid-19 dhe fatkeqësitë natyrore si zjarret dhe përmbytjet, të cilat kanë treguar dobësitë e Evropës dhe kanë rritur shpenzimet për sigurinë dhe mbrojtjen.
“Paraja është një element kritik i përgatitjes kombëtare për kriza. Ajo jo vetëm plotëson nevojat individuale, por kontribuon edhe në një rezistencë më të gjerë sistemike”, thuhet në raportin e BQE-së.
Raporti thekson një paradoks: edhe pse përdorimi i parave të gatshme në jetën e përditshme po bie për shkak të rritjes së pagesave digjitale dhe mbylljes së degëve bankare, kërkesa për to rritet kur besimi në sistemet financiare ose digjitale tronditet.
Për shembull, gjatë pandemisë, përdorimi i parave të gatshme në Evropë u rrit me 140 miliardë euro në dy vite, krahasuar me një rritje vjetore prej 55 miliardë euro para krizës, pavarësisht përdorimit të gjerë të kartave pa kontakt dhe blerjeve online.
BQE nënvizon se sistemet e parave të gatshme duhet të jenë të qëndrueshme dhe të afta për t’u përballur me krizat ekstreme, duke siguruar që qytetarët të kenë akses në monedha edhe kur sistemi digjital dështon.
