Frenkie de Jong, në qendër të një beteje të madhe mes gjigantëve të Premier League
Frenkie de Jong është kthyer në një nga objektivat më të mëdhenj të merkatos së verës për tre nga klubet më të fuqishme të Premier League: Liverpool, Arsenal dhe Manchester City. Të tria skuadrat angleze e shohin mesfushorin holandez si një element kyç për të forcuar zemrën e skuadrës përpara sezonit 2025-2026, duke ndezur një garë të fortë për firmën e tij.
Barcelona, e cila po përballet me vështirësi serioze financiare, është e detyruar të dëgjojë ofertat për lojtarin, për shkak të ngecjes së bisedimeve për rinovimin e kontratës, që skadon në vitin 2026.
Në “Anfield”, trajneri i ri Arne Slot synon të ndërtojë një mesfushë dinamike rreth De Jong, së bashku me Mac Allister dhe Szoboszlai, me fokus në kontrollin dhe vertikalitetin e lojës. Mikel Arteta, nga ana tjetër, e sheh holandezin si partnerin ideal për Declan Rice dhe Martin Odegaard, duke shtuar inteligjencë dhe siguri në mesin e fushës së Arsenalit.
Edhe Pep Guardiola e ka vënë syrin tek mesfushori i Barçës, me idenë për të ndërtuar një dyshe të fuqishme me Rodrin, në mënyrë që të ruajë dominimin e Manchester Cityt si në Angli, ashtu edhe në Evropë.
Edhe pse De Jong është shprehur i kënaqur në Barcelonë, situata ekonomike dhe mungesa e një marrëveshjeje të re e kanë vënë në pikëpyetje të ardhmen e tij. Vlera e tij e lartë në treg dhe dëshira e klubeve angleze për ta siguruar e bëjnë verën e këtij viti vendimtare për të ardhmen e tij.
Nëse Barcelona nuk arrin ta bindë të qëndrojë, rruga e Frenkie de Jong mund të përfundojë në Premier League.
