Berisha nga Himara: Më 11 maj, t’i rezervojmë Ramës atë që shqiptarët i rezervuan në 1992
Kryetari i Partisë Demokratike, Sali Berisha, nga një takim me qytetarët e Himarës, u bëri thirrje qytetarëve dhe demokratëve që më 11 maj të votojnë për ndryshimin, ashtu siç bënë shqiptarët në vitin 1992. Sipas tij, ky votim është një mundësi për çdo të ri shqiptar në arsim, punësim dhe sukses në biznes.
Berisha akuzoi kryeministrin Edi Rama për braktisje nga qytetarët në takimet elektorale, duke i quajtur këto takime “parodi për t’u shfajësuar”. Ai u shpreh se programi i opozitës synon kthimin e buxhetit të shtetit te qytetarët dhe se qeveria aktuale ka dështuar të përfshijë pensionistët dhe fermerët në ndarjen e drejtë të pasurive.
Duke kritikuar buxhetin prej 8 miliardë euro të vitit 2025, Berisha tha se vetëm 16 milionë janë ndarë për pensionistët dhe 33 milionë për fermerët, ndonëse këta të fundit kontribuojnë me 19% të PBB-së dhe punësojnë gjysmë milioni shqiptarë. Ai solli si shembull vendet fqinje, ku ndihma për shtresat në nevojë është shumë më e lartë.
“Qeveria e Malit të Zi nuk ra në humnerë, edhe pse ka trefishuar pensionet. Pse duhet të jetë ndryshe në Shqipëri?”, pyeti Berisha.
Ai akuzoi Ramën dhe bashkëpunëtorët e tij për afera korruptive, si çështja e inceneratorëve dhe kompensimi ndaj biznesmenit italian Becchetti, duke i quajtur “parodi që fshihen pas kënetave”. Sipas tij, këto janë mënyra për të shmangur përgjegjësitë.
Në fund të fjalës së tij, Berisha ftoi qytetarët që të votojnë për ndryshimin, për një të ardhme më të mirë për të gjithë, pavarësisht bindjeve politike.
“Rroftë Himara, rroftë Shqipëria. Fitore, fitore, fitore!”, përfundoi ai.
