Punëtor humb jetën në kantierin e aeroportit në Vlorë, arrestohet administratori i kompanisë ndërtuese

Një ngjarje e rëndë ka ndodhur ditën e djeshme në kantierin e ndërtimit të aeroportit në Vlorë, ku një punëtor ka humbur jetën pasi është rrëzuar nga një lartësi e konsiderueshme. Viktima është identifikuar si shtetasi D. H., 38 vjeç, punonjës i një kompanie ndërtimi që po angazhohet në ndërtimin e këtij projekti madhor.

Pas hetimeve të kryera nga specialistët për Hetimin e Krimeve në Komisariatin e Policisë Vlorë, është arrestuar në flagrancë administratori i kompanisë ndërtuese, shtetasi D. N., 45 vjeç, banues në Tiranë.

Gjithashtu, është nisur procedimi penal edhe ndaj shtetasit U. S., 41 vjeç, po nga Tirana, i cili mbante funksionin e përgjegjësit të punimeve në kantier. Sipas njoftimit të Policisë, të dy këta persona dyshohet se kanë shkelur detyrimet ligjore për masat e sigurisë në punë, duke sjellë si pasojë vdekjen tragjike të punëtorit.

Materialet hetimore janë referuar në Prokurori për veprime të mëtejshme ligjore.