Ter Stegen drejt ndarjes me Barcelonën? Gjermani po mendon largimin për Kupën e Botës

Figura e Marc-André ter Stegen po shkakton sërish tension brenda Barcelonës. Portieri gjerman, që prej muajsh është jashtë fushave për shkak të një operacioni në shpinë, po përballet me një situatë të ndërlikuar — si sportive, ashtu edhe kontraktuale — teksa Kupës së Botës po i afrohet gjithnjë e më shumë.

Sipas “Sport”, rikthimi i tij pritet në dhjetor, pak para hapjes së merkatos dimërore, por pozita e tij në skuadër ka ndryshuar ndjeshëm. Trajneri Hansi Flick e ka konsoliduar Joan García-n si portierin titullar dhe nuk planifikon të ndryshojë hierarkinë, përveçse nëse ndodh ndonjë surprizë.

Marrëdhënia mes Ter Stegen dhe klubit është tensionuar edhe më shumë pas incidentit me raportin mjekësor — kur ai refuzoi fillimisht ta firmoste, duke vonuar procesin e regjistrimit të Garcías. Ai madje humbi përkohësisht edhe shiritin e kapitenit, çka tronditi ekuilibrin brenda skuadrës.

Megjithëse situata është normalizuar me kalimin e javëve, besimi nuk është rikthyer plotësisht. Me kontratë deri në vitin 2028, portieri mbetet ndër lojtarët më të paguar të ekipit, gjë që e vendos në qendër të politikës së kursimeve të klubit katalanas.

Në anën tjetër, Federata Gjermane e Futbollit dhe trajneri Julian Nagelsmann kanë qenë të qartë: Ter Stegen duhet të ketë minuta loje në klub nëse dëshiron të jetë pjesë e kombëtares në Kupën e Botës. Nëse nuk luan rregullisht, ftesa e tij është në rrezik.

Pikërisht për këtë arsye, në Gjermani po flitet për një ndryshim qëndrimi nga vetë portieri. Pas muajsh besnikërie ndaj Barcelonës, ai po shqyrton për herë të parë mundësinë e një largimi, qoftë me huazim gjashtëmujor për t’u rikthyer në formë, apo me një transferim të përhershëm.

Barcelona, ndërkohë, e ndjek situatën me kujdes. Klubi nuk do ta detyrojë të largohet, por as nuk do ta pengojë nëse ai kërkon ndryshim. Largimi i tij do të ndihmonte në uljen e shpenzimeve të pagave, ndërsa me Garcían në formë të mirë, pozicioni i portierit konsiderohet i mbuluar.

Në këtë moment, në tavolinë janë tre skenarë të mundshëm:

Huazim gjashtëmujor – për të fituar minuta dhe për t’u rikthyer në formë para Kupës së Botës.

Transferim i përhershëm – më pak i mundshëm, por i favorshëm financiarisht për klubin.

Qëndrim në Barcelonë – me rrezikun e humbjes së statusit si titullar.

Vendimi përfundimtar pritet gjatë javëve të ardhshme, kur Ter Stegen do të zhvillojë një takim me drejtuesit sportivë të klubit.

Dimri që po afrohet mund të jetë vendimtar për të ardhmen e tij. Nëse qëndron, rrezikon të humbasë rolin kryesor në Barcelonë dhe në kombëtare; nëse largohet, mund të rigjejë formën që e bëri një nga portierët më të mirë në botë.

Topi, siç thotë vetë shkrimi spanjoll, është tani në duart e tij.