Belind Këlliçi denoncon skandalin e votave të diasporës në Greqi: “Edi Rama tejkaloi edhe udhëheqësit totalitarë”
Drejtuesi politik i Partisë Demokratike për Qarkun e Tiranës, Belind Këlliçi, ka reaguar ashpër pas skandalit të votave të diasporës shqiptare në Greqi. Sipas tij, kryeministri Edi Rama ka tejkaluar çdo imagjinatë dhe pritshmëri me manipulimin dhe vjedhjen e votave.
Në një postim në Facebook, Këlliçi e quajti këtë ngjarje “çmenduri të paparë” dhe “masakër” të votave, duke theksuar se në qarkun e Tiranës janë numëruar 1033 vota më shumë se zarfa, një shkelje flagrante që sipas tij nuk e ka bërë asnjë udhëheqës totalitar në botë.
“Skandali i votave të diasporës është kaq flagrante sa skuq edhe Kim Jong Un-in apo Lukashenko-n”, shkruan Këlliçi, duke paralajmëruar se Partia Demokratike do të vazhdojë me denoncimin dhe zbardhjen e çdo vjedhjeje të kryer nga “makineria e pushtetit”.
Ai premtoi gjithashtu se kjo “maskaradë dhe farsë” nuk do të mbarojë me kaq, duke paralajmëruar një hetim të thelluar me fakte dhe prova për të çmontuar manipulimet.
