Zvicra, destinacioni më i preferuar për gjermanët që emigrojnë

Zvicra ka kryesuar sërish listën e vendeve më të njohura në Evropë për gjermanët që zgjedhin të emigrojnë. Statistikat e fundit tregojnë se gjithnjë e më shumë shtetas gjermanë po e bëjnë fqinjin alpin shtëpinë e tyre, shkruan The Local, transmeton albinfo.ch.

Një nga arsyet kryesore është marrëveshja për Lëvizjen e Lirë të Personave (AFMP), që u ofron shtetasve të BE-së/EFTA-s akses pothuajse të pakufizuar në tregun e punës zviceran, mundësinë për të ndryshuar vendbanim nga një kanton në tjetrin, si dhe përfitime të tjera. Gjermanët nuk kanë nevojë për vizë për të hyrë në Zvicër dhe mund të aplikojnë për leje qëndrimi nëse planifikojnë të jetojnë atje më shumë se tre muaj.

Një tjetër faktor tërheqës është gjuha. Gjermanishtja është gjuha më e folur në Zvicër, çka ul barrierat gjuhësore për gjermanët që shpërngulen, edhe pse dialektet zvicerane shpesh rezultojnë të vështira për t’u kuptuar.

Përveç kësaj, Zvicra ofron paga dukshëm më të larta. Në vitin 2023, paga mesatare mujore bruto ishte 6,788 franga zvicerane (rreth 7,200 euro), ndërsa në Gjermani 3,645 euro. Tatimet më të ulëta e bëjnë vendin edhe më tërheqës, ndonëse kostoja e jetesës mbetet ndër më të lartat në botë.

Natyrisht, nuk mungon as joshja e peizazheve malore dhe liqeneve alpine, që ofrojnë një cilësi jete të lartë për ata që duan të jenë pranë natyrës.

Pas Zvicrës, Austria është destinacioni i dytë më i kërkuar për gjermanët që emigrojnë. Në fillim të vitit 2024, 232,729 gjermanë jetonin në Austri, me një rritje prej 3.4 për qind krahasuar me vitin e kaluar. Spanja mban vendin e tretë, me rreth 128,000 shtetas gjermanë të vendosur atje.

Afërsia gjeografike, mungesa e barrierave gjuhësore dhe mundësitë ekonomike mbeten arsyet kryesore që e bëjnë Zvicrën destinacionin më të preferuar për gjermanët që zgjedhin të jetojnë jashtë vendit.