Zvicër: Rritet numri i bujtjeve në hotele, mysafirët e huaj mbajnë peshën kryesore

Zvicra ka regjistruar një rritje të lehtë në numrin e qëndrimeve në hotele gjatë gjysmës së parë të vitit 2025, duke konfirmuar prirjen pozitive në sektorin turistik.

Sipas të dhënave të publikuara nga Zyra Federale e Statistikave (BFS), në total janë regjistruar 20.4 milionë bujtje, që përbën një rritje prej 1.4 për qind krahasuar me të njëjtën periudhë të vitit të kaluar.

Mbi gjysma e këtyre qëndrimeve u realizuan nga mysafirë të huaj, duke treguar kështu rolin e rëndësishëm të turizmit ndërkombëtar në industrinë zvicerane të mikpritjes.

Në anën tjetër, qëndrimet nga qytetarët zviceranë kanë pësuar një rënie të lehtë prej 0.3 për qind, krahasuar me gjysmën e parë të vitit 2024.

Pavarësisht këtij reduktimi të brendshëm, sektori hotelier në Zvicër po ecën drejt një viti tjetër rekord, pas një performance të jashtëzakonshme edhe gjatë vitit 2024.