Zelensky kërkon takim me Trumpin dhe aleatët evropianë, ndërsa Rusia përgatit ofensivë të re në lindje të Ukrainës
Presidenti i Ukrainës, Volodymyr Zelensky, ka njoftuar se Kievi po kërkon një takim të ri me presidentin amerikan, Donald Trump, dhe aleatët evropianë qysh javën e ardhshme, në kohën kur Rusia po përgatitet për një ofensivë të re në lindje të vendit.
Sipas tij, Moska ka përqendruar deri në 100 mijë trupa pranë qytetit strategjik Pokrovsk, në rajonin e Donjeckut, i cili prej muajsh është nën rrethim, por ende nuk ka rënë në duart e forcave ruse.
Pak pas deklaratave të Zelenskyt, autoritetet ukrainase raportuan për sulme masive ajrore në Dnipro, Pavlohrad dhe Zaporizhja, duke paralajmëruar se mund të ketë viktima.
Ndërkohë, ministri i Mbrojtjes i Rusisë, Andrei Belousov, u mburri me sulmet raketore dhe me dronë ndaj Ukrainës, të cilat sipas tij kanë goditur 146 objektiva strategjikë këtë vit. Ai e quajti këtë një sukses, pavarësisht humbjeve të mëdha njerëzore dhe dëmeve të rënda ekonomike që ka pësuar Rusia.
Kievit i është dashur të vajtojë përsëri javën e kaluar, kur një sulm rus në kryeqytet shkaktoi vdekjen e 22 personave, përfshirë katër fëmijë.
Nga ana tjetër, presidenti Trump, i cili e ka shpallur përfundimin e luftës si prioritet kryesor të mandatit të tij, ka paralajmëruar se mund të vendosë sanksione të reja ndaj Moskës, nëse nuk caktohet një takim ballë për ballë mes Putinit dhe Zelenskyt. Ai tha se nuk do të ketë “luftë botërore”, por një “luftë ekonomike” që sipas tij do të ishte e dëmshme për Rusinë.
Megjithatë, Trump shtoi se marrëdhënia e tij me Zelenskyn është ndryshe nga e kaluara, pasi SHBA tashmë nuk po i jep më ndihma direkte financiare Ukrainës, duke iu referuar marrëveshjes që përfshin blerjen e armëve amerikane nga vendet e NATO-s për Kievin.
Kievi ka pranuar propozimin e SHBA-së për armëpushim dhe një takim të mundshëm Zelensky-Putin, por Moska deri më tani nuk ka dhënë pëlqimin. Zëdhënësi i Kremlinit, Dmitry Peskov, tha se Putini “nuk e ka përjashtuar” një takim, por ai mund të ndodhë vetëm nëse ka përparim në bisedimet teknike.
