Varianti i ri i Covid “Stratus” (XFG) përhapet me shpejtësi – simptomë e hershme e lehtë për t’u injoruar
Një variant i ri i Covid-19, i quajtur Stratus (XFG), po përhapet me shpejtësi në Irlandë dhe tashmë është bërë lloji dominues i infeksioneve në vend. Autoritetet shëndetësore raportojnë se vetëm në javën e parë të shtatorit janë regjistruar 425 raste të reja, ndërsa 76.1% e tyre lidhen me këtë variant – krahasuar me 49.3% gjashtë javë më parë.
Sipas Organizatës Botërore të Shëndetësisë (OBSH), Stratus është klasifikuar si një “variant nën monitorim”, pasi ndonëse nuk besohet të shkaktojë sëmundje më të rënda, ka një nivel më të lartë ngjitjeje se variantet e mëparshme.
Shenja e parë e hershme
Ekspertët theksojnë se zëri i ngjirur është simptoma më e shpejtë dhe delikate që shfaq ky variant, shpesh e injoruar nga pacientët. Ky shqetësim pason më pas me simptomat tipike të Covid-19, si ethe dhe kollë.
“Një nga shenjat më të dukshme të variantit Stratus është ngjirja e zërit”, tha për Cosmopolitan UK Dr. Kaywaan Khan nga Harley Street.
Simptoma të tjera të raportuara
Sipas Irish Mirror, pacientët kanë raportuar gjithashtu:
hundë të bllokuar
dhimbje fyti
lodhje
shqetësime në stomak
Eksperti i sëmundjeve infektive në Universitetin e Kalifornisë, dr. Peter Chin-Hong, theksoi se Stratus shkakton një “spektër më të gjerë simptomash”, veçanërisht te personat e moshuar dhe ata që nuk kanë marrë vaksinën e fundit.
Rekomandimet e autoriteteve
Shërbimi Ekzekutiv i Shëndetit në Irlandë (HSE) u bën thirrje qytetarëve që, nëse shfaqin simptoma, të qëndrojnë në shtëpi të paktën 48 orë pas zhdukjes së tyre, duke shmangur kontaktin me persona në grupe të rrezikuara.
Ndërkohë, Shërbimi Kombëtar i Shëndetit në Mbretërinë e Bashkuar (NHS) kujton se simptomat e Covid-19 mbeten të gjera, përfshirë ethet, kollën, ndryshimin e shijes dhe nuhatjes, dhimbjet e muskujve dhe dhimbjet e kokës – të ngjashme me gripin apo ftohjen e zakonshme.
Megjithëse shumica e pacientëve shërohen brenda pak javësh, mjekët paralajmërojnë se disa mund të përballen me forma më të rënda ose me simptoma afatgjata të njohura si “Covid i gjatë”.
