Trump ndërmjetëson marrëveshjen historike Armeni–Azerbajxhan, shoqëruar me humor gjatë takimit
Presidenti i Shteteve të Bashkuara të Amerikës, Donald Trump, ka mbajtur të premten një takim në Shtëpinë e Bardhë ku kryeministri i Armenisë, Nikol Pashinyan, dhe presidenti i Azerbajxhanit, Ilham Aliyev, nënshkruan një marrëveshje paqeje për t’i dhënë fund konfliktit prej gati katër dekadash dhe për të rihapur rrugët kryesore të transportit në rajon.
Marrëveshja, e konsideruar historike, vjen në një kohë kur SHBA synon të shfrytëzojë ndikimin në rënie të Rusisë në Kaukazin Jugor.
Gjatë ceremonisë, Trump nuk i ka kursyer as batutat. Duke iu drejtuar presidentit të Azerbajxhanit, ai e pyeti: “Qe sa je në pozitën e liderit?”. Aliyev u përgjigj: “Janë 22 vjet”.
“22 vjet, kjo është bukur një kohë”, tha Trump, ndërsa Aliyev ia ktheu: “Po, po”.
Kreu i Shtëpisë së Bardhë vijoi me një kompliment: “Kjo nënkupton se je i fortë dhe i mençur”. “Faleminderit”, u përgjigj presidenti azerbajxhanas.
Marrëveshja pritet të hapë një faqe të re në marrëdhëniet mes dy vendeve, pas dekadash tensioni dhe përleshjesh të përgjakshme.
