Tornadot e zjarrit shkrumbojnë fshatra në Spanjë, evakuohen qindra banorë

Temperaturat ekstreme dhe erërat e forta kanë shkaktuar formimin e “tornadove të zjarrit” në veriun e Spanjës, duke përkeqësuar disa vatra të fuqishme zjarri që kanë shkrumbuar shtëpi dhe kanë detyruar evakuimin e qindra personave pranë parkut kombëtar Las Médulas, pjesë e trashëgimisë botërore të UNESCO-s.

Rreth 800 banorë u urdhëruan të largohen nga gjashtë fshatra në rajonin Castile dhe Leon, teksa temperaturat e së dielës arritën në 40°C. Kushtet ekstreme bënë që flakët të krijonin vorbulla zjarri, duke detyruar zjarrfikësit të tërhiqeshin përkohësisht nga terreni.

Shkencëtarët paralajmërojnë se rajoni i Mesdheut po përballet me rrezik gjithnjë e më të madh zjarresh për shkak të verërave të thata dhe të nxehta, ku një shkëndijë e vetme – edhe nga rrufeja – mund të përhapë flakë të pakontrollueshme.

Autoritetet spanjolle dyshojnë se disa nga zjarret janë shkaktuar nga rrufetë, por theksojnë se shumica janë vepër e zjarrvënies së qëllimshme.

Situata mbetet kritike edhe në veri të Portugalisë, ku rreth 700 zjarrfikës po luftojnë me një vatër të madhe zjarri në zonën e Trancoso-s, e shpërthyer të shtunën rreth 350 km në verilindje të Lisbonës.