Sulm në det: Autoritetet amerikane ndalojnë trafik të paligjshëm
Ushtria amerikane ka vrarë 11 persona gjatë një sulmi ndaj një varke që dyshohet se transportonte drogë të paligjshme nga Venezuela, njoftoi presidenti amerikan Donald Trump. Ky është operacioni i parë ushtarak i kryer që kur administrata Trump dislokoi luftanije në jug të Karaibeve.
“Disa minuta më parë, kemi sulmuar një varkë që po bartte shumë drogë,” tha Trump për gazetarët në Shtëpinë e Bardhë, duke shtuar se nuk pati viktima amerikane gjatë operacionit. Presidenti akuzoi se ekuipazhi i anijes ishte pjesë e bandës venezuelase Tren de Aragua, të cilën SHBA-ja e futi në listën e organizatave terroriste në shtator. Trump përsëriti gjithashtu akuzat se banda kontrollohet nga presidenti venezuelas, Nicolas Maduro, akuza që Karakasi i ka mohuar vazhdimisht.
Video të publikuara nga Trump në platformën Truth Social duket se tregojnë momentin kur varka ndiqej nga dronët dhe më pas shpërthente, por Ministri i Komunikimit i Venezuelës, Freddy Nanez, pretendoi se pamjet janë krijuar me inteligjencë artificiale.
Pentagoni ende nuk ka dhënë detaje shtesë mbi sulmin, përfshirë llojin dhe sasinë e drogës. Shtetet e Bashkuara kanë dislokuar së fundmi shtatë luftanije dhe një nëndetëse me energji bërthamore në jug të Karaibeve, duke bartur mbi 4.500 pjesëtarë të Marinës amerikane.
Sekretari amerikan i Shtetit, Marco Rubio, tha se droga dyshohet se ishte nisur për Trinidad ose ndonjë vend tjetër në Karaibe. Në Venezuelë rriten shqetësimet se sulmi mund të ketë synuar qeverinë venezuelase, pas dyfishimit të shpërblimit për informacion që çon në arrestimin e presidentit Maduro, i cili akuzohet për lidhje me trafikun e drogës dhe grupe kriminale.
Zyrtarët venezuelas njoftuan se banda Tren de Aragua nuk është më aktive në vend, pas shkatërrimit të saj gjatë një operacioni në burg në vitin 2023.
