Strategu veteran republikan Chris LaCivita u tha gazetarëve të infiltruar që hiqeshin si klientë të mundshëm për shërbime konsulence politike se gjatë vizitës në Australi po punonte si konsulent privat dhe jo në kapacitet zyrtar apo si këshilltar i presidentit të SHBA.
Një nga arkitektët e fitores së Donald Trump në zgjedhjet e vitit 2024 pretendon se ka bërë një vizitë të papublikuar në Australi për t’i dhënë këshilla Partisë Liberale lidhur me “çështje strukturore” që lidhen me Peter Dutton, përpara zgjedhjeve federale.
Strategu veteran republikan Chris LaCivita u tha gazetarëve të infiltruar që hiqeshin si klientë të mundshëm për shërbime konsulence politike se gjatë vizitës në Australi po punonte si konsulent privat dhe jo në kapacitet zyrtar apo si këshilltar i presidentit të SHBA.
Pamjet e bisedave të fshehta u publikuan të enjten nga organizatat me bazë në Evropë, Correctiv dhe Centre for Climate Reporting.
“Kam qenë në Australi dy javë më parë duke ndihmuar Partinë Liberale atje, për disa çështje strukturore që kishin me Peter Dutton,” tha LaCivita më 16 prill në thirrjen e parë nga dy që janë regjistruar. Fushata elektorale në Australi nisi më 28 mars.
“Duket se gjërat po ecin në drejtimin e duhur atje… këto përpjekje janë thjesht politike dhe nuk kërkojnë që unë të angazhohem me qeverinë e Shteteve të Bashkuara.” Në një thirrje të dytë më 24 prill, LaCivita u tha gazetarëve të infiltruar se kishte bërë udhëtimin pa e bërë publik. Ai e krahasoi këtë me punën që kishte bërë në mënyrë të hapur për partinë opozitare në Shqipëri. (Ndërkohë që kontrata e Berishës me LaCivita mbetet mister)
“Nuk mori vesh askush që isha atje,” tha ai, duke iu referuar vizitës së pretenduar në Australi. “Përpiqem të ruaj një shkallë diskrecioni … kjo na jep një liri lëvizjeje.”
Një zëdhënës i Koalicionit mohoi se LaCivita kishte ndonjë lidhje me fushatën e Dutton.
“Zoti LaCivita nuk është këshilltar, nuk ka qenë asnjëherë këshilltar dhe nuk është i përfshirë në asnjë mënyrë në fushatën e Koalicionit. Zoti Dutton nuk është takuar me të.”
Në një deklaratë për Guardian Australia, LaCivita tha: “Nuk kam punuar dhe nuk punoj për Partinë Liberale të Australisë. Ofron konsulencë për një shumëllojshmëri interesash biznesi – disa në Australi, disa në SHBA, etj. Por sa i përket ndonjë partie politike – nuk kam punuar.”
“Gjithashtu, nuk e kam takuar asnjëherë z. Dutton, por shpresoj ta takoj kur të zgjidhet kryeministër.”
LaCivita ishte bashkëmenaxher i fushatës fituese të Trump për vitin 2024, së bashku me shefen aktuale të kabinetit në Shtëpinë e Bardhë, Susie Wiles.
Trump e falënderoi LaCivitën gjatë fjalimit të fitores, dhe ky i fundit mori për pak mikrofonin për të falënderuar presidentin, duke thënë se Trump ishte “një kandidat i shkëlqyer, dhe do të jetë një president i 47-të jashtëzakonisht i mirë.”
Vizitat dhe ndarja e përvojës mes partive politike me prirje të ngjashme dhe këshilltarëve të tyre nuk janë të pazakonta gjatë fushatave zgjedhore.
Anthony Albanese më parë ka theksuar lidhjet me Partinë Laburiste britanike. Shefi i fushatës së Partisë Laburiste Australiane, Paul Erickson, ka dhënë këshilla për strategët që punonin për të zgjedhur Sir Keir Starmer në zgjedhjet britanike të vitit 2024. Më pas, Erickson u ftua të flasë në konferencën vjetore të partisë Laburiste.
Veteran i Marinës Amerikane që ka marrë medaljen Purple Heart për shërbim në Luftën e Parë të Gjirit, LaCivita ndihmoi në ndërtimin e fushatës famëkeqe “Sëift Boat Veterans for Truth”, e cila u konsiderua si goditja fatale për kandidatin demokrat John Kerry në garën presidenciale të vitit 2004 ndaj George Ë. Bush.
Gjatë fushatës, Dutton është distancuar nga lidhjet me Trump, megjithëse në fillim ka ndjekur politika që i përngjanin agjendës së ish-presidentit amerikan – duke premtuar shkurtimin e 41,000 punonjësve të administratës, duke i dhënë senatores Jacinta Nampinjinpa Price një rol për “efikasitetin qeveritar”, duke pretenduar se nxënësit po “indoktrinohen” nga kurrikula shkollore dhe duke denoncuar ABC dhe Guardian Australia si “media urrejtjeje”.
Gjatë debatit të dytë mes liderëve, Dutton tha: “Ne i besojmë SHBA. Nuk e njoh presidentin. Nuk jam takuar me të.”
Laburistët kanë përpjekur të lidhin Dutton me politikat e stilit Trump, ndërsa sondazhet tregojnë se votuesit ndihen gjithnjë e më të parehatshëm me veprimet e presidentit të SHBA, veçanërisht pas vendosjes së tarifave tregtare. Ministri i Financave, Jim Chalmers, e ka quajtur liderin e opozitës “Dogey Dutton”, duke iu referuar të ashtuquajturit departament për efikasitetin qeveritar (Doge) të krijuar nga Trump nën drejtimin e Elon Musk.
Partia Laburiste ka të ngjarë të përdorë pretendimet për vizitën e LaCivita-s si një provë të mëtejshme se agjenda e Dutton po ndikohet nga Trump-i i papëlqyer, por kjo gjithashtu sinjalizon lidhje të ngushta midis Koalicionit dhe figurave kyçe të rrethit të ngushtë të presidentit – lidhje që mund të jenë të favorshme nëse Dutton fiton zgjedhjet e së shtunës.
Duke bërë fushatë në Australinë Perëndimore, Albanese tha se Dutton është i fokusuar në “luftëra kulturore”.
“Fushata e Partisë Liberale është bërë gjithnjë e më shumë e ekstremit të djathtë nën drejtimin e Peter Dutton. Kjo është thjesht e vërteta,” tha ai./ The Guardian
