SHBA ndryshon rregullat për vizat e gazetarëve dhe studiuesve të huaj
Qeveria e Shteteve të Bashkuara ka vendosur rregulla të reja për gazetarët dhe studiuesit e huaj që qëndrojnë në vend. Sipas një publikimi në fletoren zyrtare më 28 gusht 2025, gazetarëve do t’u duhet të rinovojnë lejen e qëndrimit çdo tetë muaj pranë Shërbimit të Emigracionit (USCIS), në vend se të pajisen me leje pesëvjeçare si deri më tani.
Po ashtu, vizat për studiuesit akademikë do të jepen maksimumi deri në katër vjet, pavarësisht programit të tyre, ndërkohë që më parë mund të zgjateshin deri në pesë vjet, sidomos për programet e doktoraturës.
Administrata amerikane e justifikon ndryshimin me nevojën për “kontroll më të mirë” dhe parandalimin e abuzimeve me vizat, duke pretenduar se qëndrimet e zgjatura krijojnë probleme sigurie dhe barrë financiare për taksapaguesit.
Ndryshimet kanë nxitur kritika të forta nga universitetet dhe shoqatat akademike, të cilat paralajmërojnë se procedurat e reja burokratike do ta bëjnë më të vështirë për studentët dhe studiuesit të përfundojnë projektet e tyre dhe mund të dekurajojnë të huajt që të zgjedhin SHBA-në për studime.
Vetëm në vitin akademik 2023/24, mbi 1.1 milionë studentë të huaj kanë studiuar në SHBA – numri më i lartë në botë.
Në muajt e fundit, autoritetet amerikane kanë anuluar rreth 6000 viza studentësh, kryesisht për shtetas kinezë dhe studentë që kanë marrë pjesë në protesta kundër veprimeve të Izraelit në Rripin e Gazës.
