Rama takohet me presidenten e Komisionit Europian, von der Leyen: Diskutohet për integrimin e Shqipërisë në BE
Kryeministri i Shqipërisë, Edi Rama, zhvilloi një takim me presidenten e Komisionit Europian, Ursula von der Leyen, ku në fokus të bisedës ishte procesi i integrimit evropian dhe ecuria e negociatave të Shqipërisë me Bashkimin Europian.
Gjatë konferencës për shtyp pas takimit, Rama theksoi se Shqipëria po ecën me ritme të shpejta dhe me rezultate pozitive në përmbushjen e detyrimeve që burojnë nga procesi negociator. Ai vlerësoi gjithashtu mbështetjen e Komisionit Europian për reformat në Ballkanin Perëndimor.
“Me presidenten kemi diskutuar për të gjitha temat e interesit të përbashkët. Vlerësojmë shumë që presidentja dhe Komisioni i BE-së japin një vëmendje të veçantë procesit të përafrimit të vendeve tona me Bashkimin Europian. Ecuria e negociatave të Shqipërisë po shkon me shumë mbarësi dhe shpejtësi, ndërsa diskutuam edhe për planin e ri të rritjes, që ofron mundësi financimi për vendet e Ballkanit Perëndimor, duke mbështetur thellimin e reformave”, u shpreh Rama.
Takimi u zhvillua në kuadër të vizitës së presidentes von der Leyen në rajon, ku po diskutohet mbi hapat konkretë të integrimit dhe zhvillimit ekonomik të Ballkanit Perëndimor.
