Presidentja Osmani kujton 2 Korrikun e vitit 1990 si moment themelor në historinë e shtetndërtimit të Kosovës

Presidentja e Kosovës, Vjosa Osmani, ka kujtuar sot me krenari 2 Korrikun e vitit 1990, duke e cilësuar këtë datë si një nga momentet më të rëndësishme në historinë e shtetndërtimit të vendit.

Përmes një postimi zyrtar në Facebook, Osmani ka rikujtuar Deklaratën Kushtetuese të shpallur nga 114 delegatë të Kuvendit të Kosovës, e cila u bë para dyerve të mbyllura dhunshëm nga regjimi serb.

“Sot kujtojmë me krenari Deklaratën Kushtetuese të 2 Korrikut, të shpallur nga 114 delegatë të Kuvendit të Kosovës para dyerve të këtij institucioni të mbyllura dhunshëm nga regjimi kriminal i Serbisë. Me këtë akt historik, i cili i parapriu Kushtetutës së Kaçanikut më 7 shtator, gra e burra, sfiduan regjimin dhe i dhanë zë vullnetit të popullit për Kosovën Republikë, duke e hapur rrugën drejt pavarësisë dhe lirisë,” ka shkruar presidentja.

Ajo thekson se kjo ditë guximi dhe vizioni mbetet themeli i shtetësisë së Kosovës, duke nderuar përjetësisht delegatët e 2 Korrikut, si trasues të ëndrrës për një Kosovë të lirë dhe sovrane.

2 Korriku i vitit 1990 shënon shpalljen e Deklaratës Kushtetuese, një hap kyç drejt pavarësisë së Kosovës dhe një simbol të rezistencës ndaj shtypjes së regjimit serb në atë periudhë.