OBSH përshkallëzon ndihmën mjekësore në Gaza pas armëpushimit
Kreu i Organizatës Botërore të Shëndetësisë (OBSH), Tedros Adhanom Ghebreyesus, ka njoftuar se ekipet e organizatës kanë përshkallëzuar operacionet humanitare në Rripin e Gazës, menjëherë pas hyrjes në fuqi të armëpushimit.
Në një postim në platformën “X”, Ghebreyesus tha se OBSH ka vendosur një ekip emergjence për të forcuar kujdesin kirurgjikal dhe atë urgjent në Spitalin Al Ahli në qytetin e Gazës, ndërsa po planifikohet edhe vendosja e mëtejshme e personelit dhe pajisjeve mjekësore.
Sipas tij, tetë kamionë me furnizime mjekësore kanë hyrë tashmë në Gaza, ndërsa ilaçe dhe pajisje thelbësore janë transferuar në Spitalin Nasser në pjesën jugore të territorit.
“Sistemi shëndetësor i Gazës duhet të rehabilitohet dhe rindërtohet. Kjo krizë na jep mundësinë ta rindërtojmë atë më mirë — më të fortë, më të drejtë dhe të përqendruar te nevojat e njerëzve. Ilaçi më i mirë është paqja”, deklaroi kreu i OBSH-së.
