NIS kërkon shtyrje të sanksioneve amerikane për herë të nëntë
Industria e Naftës e Serbisë (NIS) i ka dorëzuar një kërkesë të re Departamentit amerikan të Thesarit për shtyrjen e sanksioneve, vetëm pak para skadimit të licencës aktuale më 8 tetor.
Në një deklaratë për media, kompania tha se më 3 tetor, pak para mesnatës, ka kërkuar “lëshimin e një licence të posaçme që do t’i mundësojë operimin pas afatit të tanishëm”.
NIS njoftoi gjithashtu se më 28 shtator ka paraqitur kërkesë për largim nga lista e sanksioneve, një proces që e cilësoi si “të gjatë dhe kompleks”. Kërkesa e parë për këtë qëllim ishte dorëzuar më 14 mars të këtij viti.
Sanksionet ndaj kompanisë janë shtyrë tashmë tetë herë. Ato u vendosën nga Shtetet e Bashkuara në janar, për shkak të asaj që Uashingtoni e quan “rrezik sekondar” – me qëllim parandalimin e financimit të luftës së Rusisë në Ukrainë përmes të ardhurave nga kompanitë energjetike.
Megjithëse struktura e pronësisë së NIS-it ka ndryshuar disa herë, shumica e aksioneve mbetet në duar ruse. Sipas të dhënave të fundit, Gazprom Neft, nëndegë e Gazpromit, zotëron rreth 44.9 për qind të aksioneve, ndërsa shteti i Serbisë mban 29.9 për qind. Një tjetër kompani e lidhur me Gazpromin – Inteligjenca nga Shën Petersburgu – është bërë ndër pronarët kryesorë me 11.3 për qind të aksioneve.
NIS u përfshi në listën e sanksioneve amerikane në janar të këtij viti.
