Ndërprerje e shërbimit të Starlink prek edhe Ukrainën

Shërbimi satelitor i internetit Starlink, i menaxhuar nga kompania SpaceX e Elon Muskut, ka pësuar një ndërprerje të shkurtër mëngjesin e së hënës, duke ndikuar përdoruesit në disa shtete, përfshirë edhe Ukrainën, ku rrjeti përdoret si mjet thelbësor komunikimi në vijën e frontit.

Në njoftimin zyrtar, kompania konfirmoi problemin duke theksuar se “Starlink aktualisht po përjeton ndërprerje të shërbimit. Ekipi ynë po heton”, pa dhënë hollësi të tjera.

Komandanti i forcave ukrainase për dronë bëri të ditur se sistemi u ndërpre përgjatë tërë vijës së frontit në orën 07:28 sipas kohës së Ukrainës (06:28 CET). Ai shtoi se rreth orës 08:02, shërbimi filloi të rikthehej gradualisht.

Sipas portalit Downdetector, mbi 43 mijë përdorues në Shtetet e Bashkuara raportuan probleme gjatë kësaj periudhe.

Starlink ofron internet përmes një konstelacioni satelitor në orbitën e ulët të Tokës dhe përdoret gjerësisht në zona të largëta si dhe në rajone të konflikteve në mbarë botën.