Mot i qëndrueshëm dhe temperatura të larta gjatë kësaj jave në Kosovë

Instituti Hidrometeorologjik i Kosovës (IHMK) ka njoftuar se kjo javë do të karakterizohet nga kushte të qëndrueshme meteorologjike, me mot kryesisht të kthjellët dhe me diell. Temperaturat pritet të shënojnë rritje graduale, duke arritur deri në 37 gradë Celsius në disa rajone të vendit.

Sipas IHMK-së, temperaturat minimale gjatë javës do të lëvizin ndërmjet 10 dhe 17°C, ndërsa ato maksimale pritet të sillen nga 28 deri në 37°C. Në këtë kontekst, qytetarët janë këshilluar të kenë kujdes të shtuar ndaj ekspozimit në rrezet e diellit, veçanërisht fëmijët, të moshuarit dhe personat me ndjeshmëri ndaj temperaturave të larta.

Parashikimi ditor për këtë javë:

E hënë: Moti do të jetë kryesisht me diell. Temperaturat minimale pritet të jenë nga 11 deri në 15°C, ndërsa ato maksimale nga 29 deri në 33°C. Do të fryjë erë e lehtë nga drejtime të ndryshme.

E martë: Moti mbetet me diell gjatë gjithë ditës. Temperaturat minimale do të jenë ndërmjet 14 dhe 17°C, ndërsa ato maksimale nga 28 deri në 32°C. Era do të fryjë nga veriperëndimi me shpejtësi 1-3 m/s.

E mërkurë: Parashikohet mot me diell dhe vranësira të shpërndara. Temperaturat minimale do të jenë nga 10 deri në 16°C, ndërsa maksimalet nga 29 deri në 33°C. Era do të jetë e lehtë nga veriperëndimi.

E enjte: Moti do të jetë me diell dhe vranësira të pakta, sidomos mbi relievin malor. Temperaturat minimale do të jenë ndërmjet 12 dhe 16°C, ndërsa maksimalet nga 31 deri në 35°C. Era do të fryjë nga verilindja me intensitet të lehtë deri mesatar.

E premte: Moti do të jetë me diell dhe vranësira të shpërndara. Temperaturat minimale pritet të lëvizin nga 12 në 18°C, ndërsa ato maksimale nga 32 deri në 37°C. Do të fryjë erë nga veriperëndimi me shpejtësi 1-7 m/s.

Instituti u bën thirrje qytetarëve që të shmangin qëndrimin në diell gjatë orëve të mesditës dhe të konsumojnë mjaftueshëm lëngje për të evituar dehidratimin.