Ministria e jashtme Gjermane mbron klasifikimin e AfD si ekstremist të djathtë pas kritikave nga Shtëpia e Bardhë
Ministria e Jashtme gjermane mbrojti vendimin për të klasifikuar partinë Alternative für Deutschland (AfD) si një formacion ekstremist të djathtë, pas kritikave të ashpra nga Shtëpia e Bardhë dhe liderë të tjerë amerikanë. Zëvendëspresidenti JD Vance dhe Sekretari i Shtetit Marco Rubio e kritikuan këtë veprim, duke e cilësuar si një akt të “tiranisë së maskuar”.
Në një reagim të pazakontë, Ministria e Jashtme gjermane iu përgjigj drejtpërdrejt Rubio-s në rrjetin X, duke theksuar: “Kemi mësuar nga historia jonë se ekstremizmi i djathtë duhet ndalur.” Agjencia gjermane e inteligjencës, Bundesamt für Verfassungsschutz (BfV), arriti në përfundimin se qëndrimi i AfD ndaj grupeve të caktuara të popullsisë është në kundërshtim me rendin demokratik të Gjermanisë.
Pas një rezultati rekord në zgjedhjet federale të muajit shkurt, ku AfD siguroi 20.8% të votave dhe 152 vende në Bundestag, ky klasifikim është zgjeruar për të mbuluar të gjithë partinë në nivel kombëtar. BfV e cilësoi AfD-në si një parti që synon të përjashtojë grupe të caktuara të popullsisë, sidomos ata nga vende kryesisht myslimane.
AfD reagoi duke e quajtur vendimin “politike” dhe një “goditje për demokracinë gjermane”, ndërsa liderët e partisë kanë kërkuar që të ndalohet çdo formë survejimi të mëtjeshëm. Zëvendësdrejtoresha parlamentare e AfD-së, Beatrix von Storch, e quajti këtë klasifikim si një shenjë të shtetit autoritar.
Ky klasifikim ka ngritur sërish thirrje për ndalimin e AfD-së, përpara një votimi të rëndësishëm në Bundestag për të konfirmuar Friedrich Merz si kancelar. Lideri i Socialdemokratëve (SPD), Lars Klingbeil, theksoi se kërcënimi ndaj demokracisë është real dhe duhet marrë seriozisht.
Kjo përplasje e madhe ndodh në një kohë kur Gjermania është duke u përballur me debatet historike dhe aktuale mbi luftën kundër ekstremizmit të djathtë.
