Merz dhe Macron theksojnë “frymën e Tulonit”, pak rezultate konkrete nga takimi franko-gjerman

Një atmosferë miqësore, por pak rezultate konkrete, karakterizuan Këshillin e Ministrave franko-gjerman të zhvilluar në Toulon. Kancelari gjerman Friedrich Merz dhe Presidenti francez Emmanuel Macron theksuan marrëdhëniet e mira personale dhe nevojën për bashkëpunim të ngushtë mes dy vendeve, pavarësisht krizave të brendshme dhe sfidave ekonomike.

Takimi u hap me një ceremoni ushtarake në Gjirin e Tulonit, ku Merz përshëndeti me një “Bonjour” miqësor. Delegacionet zhvilluan një mbledhje pune rreth një orë e gjysmë, e ndjekur nga një drekë simbolike mesdhetare me gazpaço, pesto dhe levrek deti.

Ndërsa dokumentet e nënshkruara përfshinin kryesisht një “road map” mbi çështje tregtare dhe konkurruese, Merz vuri theksin tek reformat e tregut të punës në Gjermani pas rritjes së papunësisë mbi tre milionë persona. Ai kërkoi gjithashtu koordinim më të fortë evropian në fushën digjitale, duke paralajmëruar një samit në Berlin më 18 nëntor.

Një tjetër pikë e rëndësishme ishte thellimi i bashkëpunimit në media. Gjermania dhe Franca nënshkruan një marrëveshje për zgjerimin e kanalit Arte dhe zhvillimin e një platforme evropiane shumëgjuhëshe, ndërsa bashkëpunimi mes Deutsche Welle dhe France Médias Monde do të zgjerohet për të ofruar informacion të besueshëm përtej kufijve të BE-së.

Megjithatë, takimi u zhvillua në sfondin e një krize serioze qeveritare në Paris, me kryeministrin François Bayrou që përballet me votëbesim të ngushtë. Në këto rrethana, Macron u paraqit si garantuesi i marrëdhënieve franko-gjermane, duke theksuar se do të qëndrojë në detyrë deri në vitin 2027.

Rezultati kryesor i samitit, sipas vëzhguesve, mbeti më shumë atmosfera e mirë sesa vendimet konkrete politike.