Marrëveshja në Shtëpinë e Bardhë: Trump i hap rrugë takimit Putin–Zelensky, por Kremlini mbetet skeptik
Takimi i së hënës në Shtëpinë e Bardhë u mbyll me një marrëveshje unanime për hapat e ardhshëm drejt dialogut mbi luftën në Ukrainë – një takim bilateral mes Presidentit rus, Vladimir Putin, dhe Presidentit ukrainas, Volodymyr Zelensky. Megjithatë, sinjalet nga Moska tregojnë se një takim i tillë është ende larg të realizohet.
Këshilltari i Kremlinit, Yury Ushakov, tha pas një telefonate mes Donald Trumpit dhe Putinit se “ideja u diskutua që do të ishte e përshtatshme të shqyrtohej mundësia e ngritjes së nivelit të përfaqësuesve të palës ruse dhe asaj ukrainase”. Por, sipas CNN, në “gjuhën e Kremlinit” kjo nënkupton se palët nuk janë aspak afër një marrëveshjeje dhe mund të mos jenë kurrë.
Putini ka deklaruar vazhdimisht se Ukraina është “pjesë e patjetërsueshme e historisë dhe kulturës ruse”, duke justifikuar agresionin e tij me njohjen e njëanshme të rajoneve separatiste në Donetsk dhe Luhansk si “të pavarura”. Nga ana tjetër, Kremlini nuk e fsheh përçmimin ndaj Zelenskyt, duke vënë rregullisht në dyshim legjitimitetin e tij për shkak të shtyrjes së zgjedhjeve nën ligjin ushtarak.
Në memorandumet e fundit të propozuara nga Moska, kërkohet që Ukraina të mbajë zgjedhje përpara se të negociohet ndonjë traktat paqeje. Madje, në deklaratat zyrtare, Putin dhe zyrtarët rusë rrallë e përmendin Zelenskyn me emër, duke përdorur shprehjen “regjimi i Kievit”.
Në prill, Zelensky udhëtoi në Turqi për të marrë pjesë në bisedimet e para të drejtpërdrejta me delegacionin rus, i cili u kryesua nga një autor tekstesh historike, jo nga figura politike të larta.
Analistët theksojnë se Putini tashmë ka fituar atë që dëshironte – një takim bilateral me Donald Trumpin, të cilin e sheh si lider të barabartë me veten. Përballja me Zelenskyn, sipas objektivave të tij të luftës, shihet si e papërputhshme me vizionin e Kremlinit.
