Manchester United dhe disa klube të tjera të Premier League në garë për talentin e Fiorentinës, Pietro Comuzzo

Manchester United ka dërguar skautë për të vëzhguar mbrojtësin e ri të Fiorentinës, Pietro Comuzzo, këtë javë, duke u bashkuar kështu me Bournemouth, Brighton dhe Sunderland në garën për shërbimet e 20-vjeçarit.

Sipas mediave italiane, skautët e klubeve kryesore angleze ndoqën ndeshjen mes Fiorentinës dhe Nottingham Forest, ndërsa sot do të kenë një tjetër mundësi për ta vlerësuar Comuzzo-n në përballjen direkte mes Manchester United dhe “Violat”.

Sezoni 2024-25 ishte shpërthyes për Comuzzo-n, i cili luajti 44 ndeshje në të gjitha garat për Fiorentinën, pas një starti me vetëm gjashtë para sezonit të kaluar. Mbrojtësi i kombëtares U20 të Italisë ka marrë edhe thirrjen e parë për kombëtaren e madhe italiane në Ligën e Kombeve.

Në janar, Napoli ofroi 30 milionë euro për transferimin e tij, ofertë që u refuzua nga presidenti i Fiorentinës, Rocco Commisso, i cili preferoi të mbante lojtarin në klub.

Tani, Manchester United dhe disa klube të tjera angleze po përpiqen ta sigurojnë një talent që po merr vëmendjen e madhe në tregun e transferimeve.