Juventusi kërkon sulmues të ri: Hojlund më pranë se Nunez, ndërsa Kolo Muani mbetet i pasigurt
Interesi i klubeve të mëdha të Premier Leagues për Randal Kolo Muanin ka detyruar Juventusin të kërkojë alternativa për repartin e sulmit. Me PSG-në që kërkon shitje të përhershme për sulmuesin francez, dhe me konkurrencën e fortë nga Newcastle, Manchester United dhe Chelsea, “Zonja e Vjetër” po has vështirësi në negociata për rikthimin e tij.
Kolo Muani kaloi pjesën e dytë të sezonit 2024/25 në huazim te Juventusi, por kthimi i tij në Torino duket gjithnjë e më pak i mundshëm.
Në kërkim të zgjidhjeve të reja, drejtuesit e Juventusit kanë hedhur sytë nga Darwin Nunez i Liverpoolit dhe Rasmus Hojlund i Manchester United. Megjithatë, për shkak të kërkesave të ndryshme financiare, Hojlund shihet si opsioni më realist për bardhezinjtë.
Liverpool kërkon 60 milionë euro për shitjen e plotë të Nunez, ndërsa nuk pranon huazim me opsion blerjeje. Në kontrast, Manchester United është e hapur për të negociuar një huazim fillestar për Hojlund, me të drejtë blerjeje në një marrëveshje që mund të arrijë deri në 50 milionë euro – një formulë më e përballueshme për torinezët.
Ndërkohë, Juventusi ka siguruar tashmë Jonathan David si lojtar të lirë dhe pritet të shesë Dusan Vlahovic gjatë kësaj vere. Për këtë arsye, trajneri Igor Tudor insiston për një tjetër sulmues qendre që do të udhëheqë repartin ofensiv në sezonin e ri.
Sipas “Tuttosport”, edhe Gonçalo Ramos, bashkëlojtari i Kolo Muanit te PSG, është në listën e dëshirave të Juventusit për merkaton e verës. Drejtuesit bardhezinj do të kenë një verë të nxehtë në merkato, ndërsa përpiqen të ndërtojnë një skuadër konkurruese për sezonin 2025/26.
