Joel Mokyr, Philippe Aghion dhe Peter Howitt fitojnë Çmimin Nobel për Ekonomi 2025
Akademia Mbretërore e Shkencave e Suedisë ka ndarë Çmimin Nobel për Shkencat Ekonomike për vitin 2025 për ekonomistët Joel Mokyr, Philippe Aghion dhe Peter Howitt, për kontributet e tyre në shpjegimin e rritjes ekonomike të nxitur nga inovacioni.
Sipas njoftimit zyrtar, Mokyr u vlerësua për rolin e tij në identifikimin e parakushteve për rritje të qëndrueshme përmes progresit teknologjik, ndërsa Aghion dhe Howitt ndanë gjysmën tjetër të çmimit për teorinë e rritjes së qëndrueshme të bazuar në “shkatërrimin krijues”.
“Laureatët na kanë mësuar se rritja e qëndrueshme nuk mund të merret si e mirëqenë. Puna e tyre tregon se duhet të jemi të vetëdijshëm për kërcënimet ndaj rritjes së vazhdueshme dhe mënyrat për t’iu përgjigjur atyre,” thuhet në deklaratën e Komitetit të Nobelit.
Çmimi për Ekonomi njihet zyrtarisht si Çmimi i Bankës së Suedisë në Shkencat Ekonomike në Kujtim të Alfred Nobelit.
Kjo vjen pas shpalljes së fituesve të çmimeve Nobel për Fizikë, Kimi, Paqe dhe Letërsi gjatë javës së kaluar.
