Gjykata Federale në SHBA ndalon shkurtimet në Zërin e Amerikës
Një gjykatës federal në Uashington ka urdhëruar administratën e presidentit Donald Trump të ndalojë shkurtimet e planifikuara të qindra punonjësve në Zërin e Amerikës (VOA).
Gjykatësi Royce Lamberth deklaroi se zyrtarët qeveritarë kishin treguar një “mospërfillje shqetësuese” ndaj vendimeve të mëparshme gjyqësore, duke theksuar se është i nevojshëm një shqyrtim i mëtejshëm për të vlerësuar nëse Agjencia Amerikane për Median Globale (USAGM) ka përmbushur mandatin e saj ligjor. Sipas tij, Zëri i Amerikës duhet të shërbejë si “një burim lajmesh i besueshëm dhe autoritar”.
Ky vendim pason ndërprerjen e papritur të transmetimeve të VOA-së në mars, me urdhër ekzekutiv të administratës amerikane. Ndërkohë, planet për të shkurtuar 532 vende pune me kohë të plotë në agjenci mbeten pezull.
