Gjeneralmajori turk Ozkan Ulutash ka rimarrë detyrën e komandantit të misionit paqeruajtës të NATO-s në Kosovë, KFOR, duke zëvendësuar gjeneralmajorin italian Enrico Barduani, i cili e kishte udhëhequr misionin gjatë vitit të kaluar.
Në fjalimin e tij të parë pas marrjes së komandës, Ulutash theksoi përkushtimin e tij për paqe të qëndrueshme dhe stabilitet rajonal. Ai shtoi se do të mbështesë dialogun ndërmjet Beogradit dhe Prishtinës si rrugë drejt stabilitetit, duke bashkëpunuar ngushtë me autoritetet e Kosovës, Policinë dhe EULEX-in.
“Prioriteti ynë mbetet të ofrojmë një mjedis të sigurt dhe liri të lëvizjes për të gjitha komunitetet në Kosovë”, tha Ulutash, duke nënvizuar se KFOR-i është i gatshëm të reagojë ndaj çdo zhvillimi të sigurisë në vend.
Kjo është hera e dytë që Ulutash udhëheq KFOR-in; mandati i tij i parë njëvjeçar filloi në tetor 2023 dhe përfundoi në tetor 2024. Karriera e tij ushtarake përfshin pozita të ndryshme në strukturat e NATO-s dhe Ushtrisë turke, duke përfshirë rolin e drejtorit për strategji në Shtabin e Përgjithshëm të Ushtrisë së Turqisë që nga viti 2021, si dhe komandant i Forcës së Reagimit të Shpejtë të NATO-s në Turqi.
Aktualisht, KFOR-i ka 4.649 paqeruajtës nga 33 shtete dhe është reaguesi i tretë i sigurisë në Kosovë pas Policisë së Kosovës dhe EULEX-it, duke mbuluar gjithashtu vijën kufitare mes Kosovës dhe Serbisë.
Ulutash shprehu mirënjohje për paraardhësin e tij Barduani dhe theksoi gatishmërinë për të vazhduar bashkëpunimin me të gjitha strukturat vendore dhe ndërkombëtare për të ruajtur stabilitetin në Kosovë.
