Euro pëson rënie të thellë ndaj dollarit pas tarifave të reja amerikane ndaj BE-së

Të hënën, euro pësoi rënien më të thellë ditore kundrejt dollarit që nga maji, duke u dobësuar me mbi 1%, ndërsa u dobësua edhe ndaj paundit me 0.8%. Kjo pasoi njoftimin se Shtetet e Bashkuara do të vendosin tarifa prej 15% për shumicën e importeve nga Bashkimi Evropian.

Kjo masë ka shkaktuar shqetësime në Gjermani dhe Francë, ku autoritetet theksuan se marrëveshja e shumëpritur tregtare midis BE-së dhe SHBA-së mund të dëmtojë ekonominë evropiane.

Marrëveshja, e cilësuar nga presidentja e Komisionit Evropian, Ursula von der Leyen, si “marrëveshja më e madhe tregtare ndonjëherë”, mbulon gati 44% të Prodhimit të Brendshëm Bruto global dhe shmangu një luftë tregtare të mundshme transatlantike.

Megjithëse tarifat e reja përbëjnë një trefishim të normës mesatare që SHBA-ja kishte vendosur më parë ndaj BE-së, ato janë më të ulëta se kërcënimi fillestar i presidentit amerikan për tarifa prej 30% që do të hynin në fuqi nga 1 gushti.