Ekspertë evropianë kërkojnë politika të reja për reduktimin e dëmit nga duhani

Ekspertë të shëndetit publik, mjekë, prodhues dhe politikëbërës nga e gjithë Evropa janë mbledhur në Samitin e 8 të Reduktimit të Dëmit nga Duhani, i zhvilluar në Athinë, për të diskutuar mbi qasje të reja dhe të bazuara në evidenca shkencore për luftimin e epidemisë globale të duhanpirjes, e cila çdo vit i merr jetën rreth 7 milionë njerëzve në botë.

Gjatë dy ditëve të punimeve, pjesëmarrësit theksuan nevojën urgjente për alternativa më të sigurta ndaj duhanit tradicional dhe për politika që synojnë reduktimin e dëmit, jo vetëm ndalimin.

Deputeti i Parlamentit Evropian dhe mjeku psikiatër Dr. Stelios Kympouropoulos deklaroi se reduktimi i dëmit është një detyrë morale dhe shëndetësore kur ekzistojnë alternativa të sigurta dhe të rregulluara. Ai bëri thirrje për politika njerëzore, proporcionale dhe të bazuara në evidenca, që ndihmojnë të rriturit të ulin dëmin e shkaktuar nga pirja e duhanit.

Sipas studimeve të prezantuara në samit, personat që vuajnë nga depresioni, ankthi apo psikozat kanë përqindje më të lartë të duhanpirjes. Ndërprerja e saj, përveçse përmirëson mushkëritë dhe zemrën, ndikon pozitivisht edhe në humor, gjumë, energji, marrëdhënie dhe ndjenjën e kontrollit personal.

Ekspertët e shëndetit publik nënvizuan se produktet pa tym, si pajisjet e avullimit, paraqesin një rrezik më të ulët sesa cigaret tradicionale – ndonëse jo të padëmshme. Shembujt e Suedisë, Mbretërisë së Bashkuar dhe Zelandës së Re tregojnë se kur ekzistojnë alternativa të rregulluara, niveli i konsumit të duhanit bie ndjeshëm më shpejt.

Dr. Kympouropoulos propozoi pesë hapa kryesorë për politikat e BE-së në këtë fushë:

Ndarja e qartë mes produkteve që digjen dhe atyre pa tym;

Diferencim taksash për të nxitur kalimin drejt produkteve me më pak rrezik;

Monitorim i vazhdueshëm i efekteve;

Përfshirja e mjekëve në hartimin e udhëzimeve;

Rregulla etike për mbrojtjen e të rinjve.

Ai theksoi se avullimi është shumë më pak i dëmshëm për të rriturit që kalojnë nga cigaret, por kërkoi masa strikte për të parandaluar përdorimin nga të miturit.

Në përfundim të samitit, ekspertët apeluan për një qasje të balancuar që ndërthur shkencën, etikën dhe zbatueshmërinë, duke theksuar se politikat duhet të udhëhiqen gjithmonë nga provat shkencore dhe jo nga paragjykimet.

Për më shumë informacion: Shikoni videon në YouTube

Burimi: Euronews Albania