Bebe Rexha shpërthen në emocione pas kritikave për pamjen në Met Gala: “Kam PCOS, mbeta shtatzënë dhe nuk funksionoi”

Këngëtarja shqiptaro-amerikane Bebe Rexha ka ndarë një rrëfim të dhimbshëm dhe shumë personal pas kritikave që mori për pamjen e saj gjatë paraqitjes në Met Gala 2025. Artistja e hitit “In the Name of Love”, e cila debutoi për herë të parë në këtë ngjarje me një veshje nga Christian Siriano, u vu në qendër të vëmendjes në rrjetet sociale për shtimin në peshë – komente që ajo i ka përjetuar thellë.

Përmes një postimi emocional në platformën X (ish-Twitter), që më pas u fshi, këngëtarja e nominuar për Grammy shkroi:
“Jam shumë e lodhur nga komentet për peshën time. Kam PCOS dhe përballem me infertilitet. Mbeta shtatzënë, dhe nuk funksionoi. E kam mbajtur këtë dhimbje në heshtje. Nuk i detyrohem askujt të vërtetën time, por ndoshta do t’ju bëjë të mendoni dy herë përpara se të komentoni trupin e dikujt.”

Reagimi i saj erdhi gjithashtu si përgjigje ndaj disa deklaratave të ashpra të reperes Azealia Banks. Megjithatë, Rexha e mbylli mesazhin me një ton më të butë, duke thënë:
“Tani do të vazhdoj ditën time. Ju dua, kalofshi bukur.”

Bebe Rexha ka qenë ndër vite e hapur për betejën me sindromën e vezores policistike (PCOS) – një çrregullim hormonal që ndikon në fertilitetin dhe metabolizmin e grave. Në maj të vitit të kaluar, ajo rrëfeu në TikTok se kishte përjetuar një dhimbje të fortë që e çoi në urgjencë:
“Mjeku mendoi se ishte apandesit, por në fakt ishte një kist që kishte shpërthyer. Më vinte për të vjellë nga dhimbja. E vetmja gjë që më ndihmoi ishte një jastëk ngrohës,” tha ajo, duke u ofruar mbështetje dhe këshilla vajzave që përballen me të njëjtin problem.

Edhe pse përballet me sfida shëndetësore dhe kritika të vazhdueshme në rrjet, Rexha mundohet të ruajë një qëndrim pozitiv dhe të frymëzojë ndjekësit e saj:
“E di që kam shtuar peshë. Njerëzit kalojnë nëpër ndryshime. Nuk do të gënjej, më mërzit kur lexoj disa komente, por kjo vjen me këtë profesion. Po mësoj të mos e gjykoj veten dhe të pranoj veten, ndërsa përpiqem të bëj zgjedhje më të shëndetshme. Ajo që kam mësuar është se nuk të përcaktojnë numrat, por zemra jote.”

Ky rrëfim i sinqertë i Bebe Rexhës ka nxitur një valë solidariteti nga fansat, të cilët kanë vlerësuar guximin e saj për të ndarë betejat personale dhe për të qëndruar e vërtetë në një industri që shpesh gjykon me pamjen e jashtme.