BE diskuton mbështetjen për Ukrainën dhe situatën në Gazë në dy ditë takimesh në Kopenhagë
Ministrat e Mbrojtjes dhe të Jashtme të Bashkimit Evropian do të zhvillojnë këtë fundjavë takime në Kopenhagë për të diskutuar mbi mbështetjen e vazhdueshme për Ukrainën dhe situatën humanitare dhe ushtarake në Rripin e Gazës.
Takimi vjen një ditë pas sulmit rus mbi kryeqytetin ukrainas, Kiev, ku humbën jetën të paktën 21 persona, përfshirë fëmijë, dhe u plagosën të paktën 48 të tjerë.
Ministrat e Mbrojtjes të BE-së do të diskutojnë të premten mënyrat për të rritur mbështetjen ushtarake ndaj Ukrainës dhe për të forcuar bashkëpunimin me industrinë e mbrojtjes së vendit, duke marrë parasysh kufizimet e Shteteve të Bashkuara në ofrimin e armëve.
Ndërkaq, ministrat e Jashtëm do të përqendrohen të shtunën tek planet për sanksione të reja ndaj Rusisë, me qëllim të ushtrojnë presion mbi presidentin Vladimir Putin për t’i dhënë fund luftës dhe për t’u angazhuar në bisedime për paqe. Në rend dite është edhe diskutuara për asetet e ngrira të bankës qendrore ruse në BE, që arrijnë rreth 210 miliardë euro, si dhe garanci të mundshme sigurie për Ukrainën pas përfundimit të konfliktit.
Në Kopenhagë do të marrin pjesë edhe ministrat e Jashtëm të Ukrainës, Islandës, Norvegjisë dhe Mbretërisë së Bashkuar.
Përveç Ukrainës, ministrat e Jashtëm do të diskutojnë edhe situatën në Rripin e Gazës. BE-ja është e ndarë mbi mënyrën e përgjigjes ndaj raportit që gjeti se veprimet e Izraelit në këtë territor bien ndesh me marrëveshjen BE-Izrael për respektimin e të drejtave të njeriut. Disa vende, përfshirë Francën dhe Spanjën, kërkojnë një qëndrim më të ashpër ndaj Izraelit, ndërsa të tjera, si Gjermania, janë kundër sanksioneve.
Lufta në Gazë nisi më 7 tetor 2023, kur Hamasi vrau 1.200 njerëz në jug të Izraelit dhe mori rreth 250 pengje. Prej atëherë, mbi 62.000 palestinezë kanë humbur jetën, sipas të dhënave të Ministrisë së Shëndetësisë në Gazë, dhe shumë të tjerë po përballen me kequshqyerje dhe krizë humanitare.
Shtetet e Bashkuara, Katari dhe Egjipti po përpiqen të ndërmjetësojnë për të dhënë fund konfliktit.
