“Aussie Trump” dështon në Australi: Retorika pro-Trump kthehet në bumerang për Dutton-in
Australia duket se po refuzon versionin e saj të “MAGA”-s, ndërsa politikanët që modelohen sipas Donald Trump-it po përballen me humbje të rënda. Një ndër shembujt më të spikatur është Ben Dawkins, i cili aq i bindur për një ndryshim të madh në vend, ndryshoi ligjërisht emrin e tij në Austin “Aussie” Trump. Megjithatë, ai nuk arriti të rifitonte vendin në zgjedhjet shtetërore muajin e kaluar.
Ky dështim ka shërbyer si paralajmërim për liderin e opozitës Peter Dutton, i cili ka vite që e ka zhvendosur Partinë Liberale drejt së djathtës ekstreme, duke përqafuar stilin luftarak të Trump-it. Retorika e tij e ashpër ndaj emigracionit, krimit, politikave “woke” dhe dyshimet ndaj ndryshimeve klimatike e kanë bërë atë një figurë përçarëse në skenën politike australiane.
Megjithëse në janar duket se strategjia e tij po funksiononte, me koalicionin opozitar që kaloi për herë të parë Partinë Laburiste në sondazhe, lidhjet e tij të ngushta me Trump-in nisën të kthehen kundër tij pas shpalljes së një lufte globale tregtare nga ish-presidenti amerikan. Tarifat e Trump-it rrezikuan ekonominë australiane dhe besimi ndaj Dutton-it ra ndjeshëm.
Sondazhet e fundit e pozicionojnë koalicionin e Dutton-it në 46%, pas laburistëve me 54%, ndërsa vlerësimi personal i tij ka rënë në -17. Sipas profesor Rodney Smith nga Universiteti i Sidneit, Dutton ka dështuar të mbajë një qëndrim të qartë, duke u tërhequr nga disa prej politikave që vetë kishte promovuar.
Votuesit e përshkruajnë atë si “agresiv”, “i lig” dhe “shumë si Trump-i”, ndërsa retorika e tij e fundit, përfshirë premtimin për të shkurtuar 41,000 vende pune në administratën publike dhe sulmet ndaj diversitetit, vetëm sa e kanë thelluar këtë perceptim.
Situata në Australi pasqyron një tendencë të ngjashme në Kanada, ku lideri konservator Pierre Poilievre humbi përballë liberalëve pas përqafimit të modelit Trump. Megjithatë, analistët paralajmërojnë se rrethanat politike ndryshojnë nga vendi në vend dhe se fitorja e laburistëve në Australi nuk vjen si pasojë e një valë entuziazmi për kryeministrin aktual Anthony Albanese.
Zgjedhjet federale në Australi pritet të mbahen këtë të shtunë, ku do të shihet nëse publiku do t’i japë një mandat të dytë Albaneses apo do të ndëshkojë më tej retorikën “Aussie Trump”.
