Andi Mustafaj: PD po vazhdon fushatën pa u ndikuar nga SPAK dhe sulmet e opozitës
Në një intervistë të dhënë për emisionin e mëngjesit Kafe Shqeto në Syri TV, Andi Mustafaj, zëdhënës i fushatës elektorale të Partisë Demokratike dhe Aleancës për Shqipërinë Madhështore, ka komentuar situatën aktuale politike dhe sjelljen e SPAK në lidhje me publikimin e kontratës së lobimit të PD në SHBA.
Mustafaj ka theksuar se Partia Demokratike ka kërkuar vazhdimisht thyerjen e rrethimit ndërkombëtar që mazhoranca e ka krijuar ndaj opozitës shqiptare. Ai ka vlerësuar se kjo është pjesë e një strategjie të gjerë për të njohur realitetin shqiptar nëpër botë, dhe për të rritur mesazhin e PD. Ai gjithashtu ka përmendur rezolutat e CDI, qëndrimet e Parlamentit Evropian, dhe vizitën e Berishës në Berlin si hapa të rëndësishëm në këtë drejtim.
Në lidhje me SPAK, Mustafaj ka thënë se ky institucion, i cili nuk është organ politik, ka ndikuar politikisht me veprimet e tij. Ai ka theksuar se SPAK mund të kishte pritur disa javë para se të ndërhynte në fushatën elektorale, duke shmangur pasojat që mund të ndikojnë negativisht në demokracinë shqiptare. Sipas tij, megjithatë, PD ka treguar se mund t’i dalë përballë këtyre sfidave.
Mustafaj ka shprehur bindjen se PD ka dalë nga kompleksi i inferioritetit dhe është e gatshme për betejën politike. Ai ka bërë thirrje për demokratët dhe qytetarët të vazhdojnë fushatën elektorale pa u shpërqendruar, duke theksuar se kjo është rruga e duhur për fitoren në 11 maj.
