Ambasada e Gjermanisë në Kosovë ka reaguar pas vendimit të Komisionit Qendror të Zgjedhjeve (KQZ) për të moscertifikuar Listën Serbe në zgjedhjet lokale të 12 tetorit, duke ngritur shqetësime për përjashtimin e partive nga gara zgjedhore.
Në një përgjigje për Klan Kosova, ambasada theksoi rëndësinë e pjesëmarrjes së barabartë në procesin demokratik, për aq kohë sa partitë i përmbushin kriteret ligjore.
“Jemi të shqetësuar që partitë politike po përjashtohen nga zgjedhjet. Ashtu si në shkurt, ku KQZ-ja refuzoi gjithashtu certifikimin e Listës Serbe (SL), SL tani po apelon nëpërmjet Panelit të Ankesave dhe Parashtresave Zgjedhore (ECAP). Ne e mirëpresim këtë hap. Të gjitha partitë që plotësojnë kërkesat e nevojshme dhe që përputhen me ligjin e Kosovës duhet të kenë mundësinë të marrin pjesë në zgjedhje demokratike. Ne presim që të gjitha palët e interesuara të zbatojnë rendin procedural të bazuar në rregulla, për të siguruar një proces zgjedhor transparent dhe gjithëpërfshirës,” thuhet në reagimin e ambasadës.
Ndërkohë, Lista Serbe ka paraqitur ankesë pranë Panelit Zgjedhor për Ankesa dhe Parashtresa (PZAP), duke kundërshtuar vendimin e KQZ-së për moscertifikim.
Ky zhvillim pritet të trajtohet në ditët në vijim nga organet kompetente, ndërsa ambasadat perëndimore kanë theksuar nevojën për procese zgjedhore të drejta dhe gjithëpërfshirëse në Kosovë.
