SPAK nis hetimet për korrupsion zgjedhor në Kukës, arrestohet një person, një tjetër në kërkim – Akuza të forta për veprimet selektive të drejtësisë
Prokuroria e Posaçme kundër Korrupsionit dhe Krimit të Organizuar (SPAK) ka nisur një procedim penal për veprën penale të “Korrupsionit aktiv në zgjedhje”, pas një materiali të referuar nga Drejtoria Vendore e Policisë Kukës. Sipas njoftimit zyrtar të SPAK, një grup personash dyshohet se kanë shpërndarë para për të blerë vota në favor të Partisë Social Demokrate (PSD) në zgjedhjet e 11 majit 2025.
Më 10 maj, gjatë një operacioni të përbashkët mes SPAK dhe Policisë së Kukësit, u arrestua në flagrancë shtetasi Kalosh Peposhi, ndërsa një tjetër person, Gazmend Peposhi, me detyrë kryeplak i fshatit Lusen, është shpallur në kërkim. Nga kontrolli në vendngjarje janë sekuestruar 205.500 lekë, 525 euro, një aparat celular (iPhone) dhe një automjet tip “Mercedes Benz”.
Sipas SPAK, dy shtetasit e përfshirë i kanë premtuar dhe ofruar para disa votuesve në njësinë administrative Ujmisht dhe fshatrat Lusen, Matranxhë e Bushtricë, me qëllim orientimin e votës në favor të PSD-së, duke kryer kështu veprën penale të parashikuar nga nenet 328 dhe 25 të Kodit Penal.
Akuza për standard të dyfishtë
Ndërkohë që votat janë ende në proces numërimi, veprimet e SPAK kanë ngjallur dyshime dhe kritika të forta për selektivitet dhe mungesë të vullnetit për të hetuar krimet zgjedhore në mënyrë të plotë dhe të drejtë. Zëra nga opozita, media dhe përfaqësues të huaj e kanë cilësuar këtë aksion si një tentativë për të shpërlarë imazhin e një institucioni të përgjumur dhe joefektiv përballë shkeljeve të rënda elektorale që, sipas tyre, janë kryer hapur në zona të tjera të vendit, përfshirë Tiranën.
Përmendet rasti i një incidenti të rëndë zgjedhor në Tiranë, i ndodhur LIVE në ekranet televizive, për të cilin SPAK nuk ndërhyri, pavarësisht gjashtë thirrjeve telefonike nga drejtuesi politik i PD-së në kryeqytet, Belind Këlliçi. Kjo sjellje e strukturave të drejtësisë shihet si shërbim ndaj qeverisë dhe instalimit të një diktature të bazuar në manipulimin e votës.
Sipas kritikëve, SPAK vijon të heshtë për qindra afera të mëdha korruptive dhe përdor “rastet periferike” si alibi për të justifikuar ekzistencën e vet, ndërkohë që korrupsioni zgjedhor, sipas tyre, mbështetet financiarisht pikërisht nga fondet që kurrë nuk janë hetuar seriozisht.
Prokuroria e Posaçme ka bërë të ditur se hetimet vijojnë për të identifikuar dhe ndëshkuar edhe votuesit që kanë pranuar shumat monetare në këmbim të votës.
Reagimet pritet të shtohen
Ky zhvillim pritet të nxisë debat të ashpër politik në ditët në vijim, veçanërisht nëse SPAK nuk zgjeron hetimet në të gjitha zonat ku janë raportuar manipulime. Opozita dhe një pjesë e shoqërisë civile kërkojnë që drejtësia të mos funksionojë si një instrument selektiv, por të godasë realisht abuzimin me votën dhe fondet publike që minojnë demokracinë.
