Sekretari i Përgjithshëm i Partisë së Lirisë: 11 maji, “Moment Historik” për rikthimin e demokracisë

Në një deklaratë të fortë për mediat, Sekretari i Përgjithshëm i Partisë së Lirisë, Z. Tedi Blushi, ka vlerësuar zgjedhjet e 11 Majit si një “mundësi të papërsëritshme” për Shqipërinë, duke i cilësuar ato si një pikë kthese për rikthimin e demokracisë dhe shpresës në vend. Ai i ka bërë thirrje qytetarëve, veçanërisht të rinjve dhe familjeve shqiptare, të marrin pjesë masivisht në votime, duke e quajtur votën “mjetin më të fuqishëm” për ndëshkimin e keqqeverisjes dhe sjelljen e ndryshimit të shumëpritur.

Në fjalën e tij, Blushi ka akuzuar qeverinë aktuale për “varfërimin e shqiptarëve” dhe “shndërrimin e vendit në një narkoshtet”. Sipas tij, “niveli i kriminalitetit dhe klientelizmit ka arritur kulmin” ndërsa shteti “është kapur nga banda të ndryshme, duke shkelur të drejtat dhe pronat e qytetarëve”.

Ai theksoi se 11 Maji ofron gjithashtu një shans për socialistët “e ndershëm” për të ndëshkuar “devijimin nga vlerat e vërteta” dhe për të dënuar “korrupsionin e Rilindjes”.

“Ende 48 orë na ndajnë nga lëngata, varfëria dhe mjerimi që sekti kriminal i ‘Rilindjes’ mbolli në çdo vatër shqiptare,” – deklaroi Blushi, duke ftuar për një “ditë rizgjimi të demokracisë” dhe “festë të madhe të popullit shqiptar.”

Në përmbyllje të deklaratës, ai prezantoi programin e parë 100-ditësh të Partisë së Lirisë në rast fitoreje:

Minimum jetik prej 200 eurosh për çdo pensionist e të papunë me ndihmë ekonomike.

Rritje e pensioneve me 20%, e pagës minimale në 500 euro dhe të pagës mesatare në 1,200 euro.

Kartë Konsumatori për përfitim të TVSH-së së kthyer për ushqimet bazë, energjinë elektrike, ujin dhe ilaçet (rreth 450 euro për vit).

Ulja e çmimit të energjisë elektrike në 7 lekë/kW dhe e naftës me 35–40%.

Falje gjobash për energjinë dhe ujin për pensionistët, punonjësit me të ardhura të ulëta, nënat kryefamiljare, familjet në ndihmë ekonomike, të papunët dhe biznesin e vogël.

Blushi gjykon se këto reforme do të rikthejnë prosperitetin dhe do të mbrojnë “familjen si qelizën bazë të shoqërisë”.

Postimi Zyrtar i Partisë së Lirisë
Në një postim në rrjetet sociale, Partia e Lirisë ka përsëritur thirrjen për “mision patriotik” dhe pjesëmarrje masive në referendum. Sipas postimit, vota për Nr. 1 “PD–Aleanca për Shqipërinë Madhështore” dhe për kandidatin Ilir Metaj në Qarkun e Tiranës do të shndërrohet në “një forcë ndëshkuese” kundër “narkodiktaturës” dhe “mosmbajtjes së premtimeve” nga pushteti aktual.

Mitingu final i fitores do të mbahet sot në “Bulevardin e Ri”, ku të gjithë qytetarët e Tiranës dhe Shqipërisë janë ftuar të “bëhen pjesë e epokës së re” që, sipas tyre, “është më pranë se kurrë”.