Kalimet e parregullta kufitare drejt Bashkimit Evropian kanë shënuar një rënie të ndjeshme prej 31% në tremujorin e parë të vitit 2025, krahasuar me të njëjtën periudhë të një viti më parë. Sipas të dhënave të publikuara nga Frontex, Agjencia Evropiane e Rojës Kufitare dhe Bregdetare, rreth 33,600 persona u regjistruan duke hyrë ilegalisht në BE gjatë kësaj periudhe.
Rënia më e madhe është vërejtur në rrugën e Ballkanit Perëndimor, me 64% më pak hyrje sesa në tremujorin e parë të 2024-ës. Kjo i atribuohet kryesisht aderimit të Bullgarisë dhe Rumanisë në Zonën Shengen më 1 janar të këtij viti, që ka sjellë rritje të prezencës së forcave kufitare dhe masa më të forta kontrolli.
Edhe rruga e Mesdheut Qendror ka përjetuar ulje të ndjeshme të emigrantëve gjatë marsit, gjë që Frontex e lidh me stuhitë që përfshinë Italinë në gjysmën e dytë të muajit. Megjithatë, në janar dhe shkurt 2025 është vërejtur një rritje prej 48% në këtë rrugë krahasuar me të njëjtën periudhë të vitit të kaluar, me afro 7,000 migrantë që kaluan drejt Evropës – kryesisht nga Pakistani, Bangladeshi dhe Siria.
Ekspertët theksojnë se shifrat e Frontex përfaqësojnë vetëm hyrjet e zbuluara, ndërsa numri i vërtetë i kalimeve të parregullta mund të jetë dukshëm më i lartë. Trafikimi ilegal mbetet një sfidë serioze, pavarësisht përpjekjeve të autoriteteve për ta frenuar atë.
Vetëm gjatë këtij viti, mbi 8,000 emigrantë kanë kaluar Kanalin drejt Britanisë, ndërsa autoritetet kanë çmontuar 10 rrjete të trafikut në tremujorin e parë dhe 22 të tjera gjatë gjithë vitit 2024.
Policia franceze ka evidentuar një dukuri të re: shfaqjen e bandave “100 për qind afrikane” që operojnë në bashkëpunim me kontrabandistë shqiptarë dhe irako-kurdë – aktorë të njohur prej kohësh në rrjetet e trafikimit të njerëzve. Ky evolucion tregon përshtatshmërinë e lartë të grupeve kriminale dhe sfidat e vazhdueshme me të cilat përballet Evropa në menaxhimin e migracionit të paligjshëm.
