Nenad Tomovic rikthen debatet për dronin e ndeshjes Serbi – Shqipëri dhe flet për takimin e radhës

Futbollisti serb Nenad Tomovic, në një intervistë për “Sportinho”, është rikthyer të flasë për ngjarjet e njohura të ndeshjes Serbi – Shqipëri më 14 tetor 2014, kur një dron mbante flamurin e Shqipërisë etnike mbi fushë.

Tomovic insiston se droni ishte i inskenuar dhe se futbollistët shqiptarë e dinin paraprakisht se do të ndodhte një provokim. “Sinqerisht, ishte një provokim i madh ta shihnim atë flamur të valëvitej mbi kokat tona. Stefani reagoi me zgjuarsi dhe e hoqi menjëherë. Mund ta shihni nga reagimi i tyre, si filluan ta mbronin flamurin. Mendoj se gjithçka ishte e planifikuar, e organizuar… Atë që planifikuan, më në fund e arritën,” deklaroi 38-vjeçari.

Ai foli gjithashtu për ndeshjen e një viti më vonë në Elbasan, ku Serbia fitoi 2:0, duke theksuar motivimin e ekipit për hakmarrje: “Luajtëm shkëlqyeshëm taktikisht, të gjithë ishim tepër të motivuar. Tre pikët merren në fushë, jo pas një skandali.”

Për ndeshjen e ardhshme mes Serbisë dhe Shqipërisë që do të zhvillohet në Leskovc, Tomovic tha se Serbia duhet të fitojë: “Mendoj se cilësia jonë individuale dhe ekipore është shumë më e madhe se e Shqipërisë. Çelësi do të jetë durimi dhe organizimi, të mos nxitohemi për të shënuar një gol me çdo kusht. Kemi të gjitha parakushtet për ta fituar këtë ndeshje.”