Berisha nis fushatën zgjedhore me një mesazh të fortë nga Brescia: “Vota e diasporës vendimtare për një Shqipëri madhështore”

Brescia, Itali – Në orën 16:00 të ditës së sotme, Partia Demokratike dhe Aleanca për Shqipërinë Madhështore organizuan një takim të rëndësishëm me diasporën shqiptare në Itali, në ambientet e ‘Teatro Clerici’, via San Zeno 168, në qytetin e Brescias. Në këtë aktivitet mori pjesë edhe Kryetari i PD-së, Prof. Dr. Sali Berisha, i cili mbajti një fjalim entuziast përpara një salle të mbushur me shqiptarë që besojnë në vlerat e lirisë dhe ndryshimit.

Berisha theksoi rëndësinë kyçe të votës së diasporës për zgjedhjet e 11 majit, duke deklaruar: “Shqipëria nuk është një vend për t’u braktisur, por e tillë është bërë nga qeveria aktuale me narkoshtetin dhe narkodiktaturën.” Ai u bëri thirrje bashkatdhetarëve që jetojnë në Itali dhe Greqi të shfrytëzojnë mundësinë për të votuar të parët, duke filluar nga dita e hënë, për të dhënë një mesazh të qartë kundër varfërisë dhe korrupsionit.

Takimi në Brescia shënon nisjen zyrtare të fushatës zgjedhore për liderin e opozitës, i cili prezantoi programin e “Paketës së Dhembshurisë”. Sipas Berishës, kjo platformë synon eliminimin e varfërisë ekstreme brenda 100 ditëve të para të qeverisjes së re, dhe përfshin masa konkrete për ta bërë Shqipërinë një vend të denjë për të jetuar.

“Vota e shqiptarëve në Brescia nuk është vetëm për një rotacion politik, por për të ardhmen e kombit,” – u shpreh Berisha, ndërsa ftoi të gjithë bashkatdhetarët të kontribuojnë me votën e tyre për një të nesërme më të mirë dhe më dinjitoze për Shqipërinë.

Ky takim u prit me entuziazëm dhe shpresë, duke dëshmuar se diaspora mbetet një forcë e fuqishme dhe e vendosur për ndryshim.