Zjarret në Gramsh, disa vatra ende aktive; banorët fillojnë kthimin në shtëpi

Disa vatra zjarresh në Gramsh vijojnë të jenë aktive, ndërsa ekipet e emergjencës po punojnë intensivisht për shuarjen e tyre të plotë. Në njësinë administrative të Ermenjit, zjarri është vënë nën kontroll, duke lehtësuar situatën për banorët.

Kushtet atmosferike sot janë më të favorshme, pasi mungesa e erës ka ndihmuar punën e ekipeve në terren. Vatra aktive ka edhe në zonat e Kodovjatit dhe Skënderbegasit, ku po punohet për izolimin e plotë.

Banorët kanë filluar të kthehen në shtëpitë e tyre, pasi rrugët janë të hapura dhe nuk përbëjnë rrezik. Paralelisht, po punohet për groposjen e bagëtive të djegura, me qëllim parandalimin e epidemive të mundshme.

Sipas të dhënave paraprake, rreth 40 shtëpi në fshatrat e Gramshit janë djegur dhe janë bërë të pabanueshme. Nga verifikimet në terren, raportohet se 50-60 bagëti dhe disa dhjetëra kafshë pune nuk kanë arritur të shpëtojnë nga flakët. Evidentimi i plotë i dëmeve vazhdon.

Autoritetet dhe ekipet emergjente apelojnë për kujdes dhe bashkëpunim të komunitetit deri në zhdukjen totale të flakëve.