Zvicra dëboi padrejtësisht një shqiptar nga Kosova – GJEDNJ e dënon me 19 mijë euro dëmshpërblim
Një shqiptar nga Kosova ka fituar betejën ligjore kundër Zvicrës në Gjykatën Evropiane për të Drejtat e Njeriut (GJEDNJ), e cila vendosi se dëbimi i tij kishte shkelur të drejtën për jetën private dhe familjare, të garantuar nga neni 8 i Konventës Evropiane.
Emigranti, sot 35 vjeç, kishte mbërritur në Zvicër që në moshën pesë muajsh, përmes ribashkimit familjar në kantonin e Tisinës në vitin 1989. Edhe pse i rritur dhe i integruar në shoqërinë zvicerane, ai u përfshi më vonë në aktivitete kriminale. Në vitin 2009, ai u dënua me 26 muaj burg për vepra të rënda penale, përfshirë sulme të dhunshme dhe kërcënime me vdekje.
Pas këtij dënimi, autoritetet zvicerane ia revokuan lejen e qëndrimit dhe vendosën dëbimin e tij nga vendi. Megjithatë, ky vendim u zbatua vetëm pas 14 vjetësh, në korrik të vitit 2023.
Në ankesën e paraqitur në GJEDNJ, shqiptari argumentoi se dëbimi i tij përbënte një shkelje të rëndë të të drejtave të tij, për shkak të lidhjeve të forta familjare e sociale në Zvicër dhe problemeve serioze shëndetësore, pasi ai vuan nga një defekt në zemër.
Gjykata në Strasburg i dha të drejtë, duke theksuar se autoritetet zvicerane nuk kishin shqyrtuar siç duhet ndikimin e dëbimit në jetën e tij personale dhe mjekësore. Ajo vendosi që Zvicra të paguajë 19,000 euro dëmshpërblim për shkeljen e të drejtave të tij.
Ky vendim nënvizon balancën e ndjeshme mes të drejtave themelore të individit dhe nevojës së shtetit për të mbrojtur rendin publik, sidomos kur bëhet fjalë për persona që janë rritur dhe integruar në vendin pritës.
