Zbulohet një funksion i ri i rrudhave të gishtave në ujë: A janë të njëjta çdo herë?
Nëse ke qëndruar ndonjëherë gjatë në vaskë apo pishinë, me siguri ke vënë re që gishtat e duarve bëhen të rrudhur – një fenomen që deri tani konsiderohej më shumë si kuriozitet. Por një studim i ri i publikuar në Journal of the Mechanical Behavior of Biomedical Materials ka zbuluar se këto rrudha nuk janë rastësore – ato ndjekin një model të caktuar dhe mund të kenë rëndësi të madhe edhe për mjekësinë ligjore.
Profesori i asociuar Guy German nga Universiteti i Binghamton-it, së bashku me ish-studenten Rachel Laytin, hulumtuan nëse rrudhat në gishta formohen njësoj çdo herë pas ekspozimit në ujë. Ata zhytën gishtat e pjesëmarrësve në ujë për 30 minuta, i fotografuan, dhe e përsëritën të njëjtin proces pas 24 orësh. Rezultatet treguan se rrudhat ndjekin të njëjtin model në çdo zhytje – për shkak se enët e gjakut nën lëkurë nuk ndryshojnë pozicion ndjeshëm.
Por zbulimi më befasues erdhi kur një student me dëmtim të nervit median në gishta nuk formoi asnjë rrudhë gjatë testit – duke provuar se rrudhat nuk janë vetëm efekt i ujit, por i lidhur ngushtë me sistemin nervor.
Ky studim, i frymëzuar nga një pyetje e thjeshtë e një nxënësi, mund të shndërrohet në një ndihmesë të çmuar për hetimet kriminalistike, veçanërisht për identifikimin e trupave që kanë qëndruar gjatë nën ujë.
“Gjithmonë mendoj për biometrinë dhe gjurmët e gishtave,” tha German, djali i një oficeri policie të dalë në pension në Mbretërinë e Bashkuar. “Është si të jesh fëmijë në një dyqan ëmbëlsirash – ka aq shumë shkencë që ende nuk e njohim.”
Ky kërkim jo vetëm që i dha përgjigje një pyetjeje të thjeshtë, por hapi dyer për zbulime të reja në biologji, inxhinieri dhe kriminalistikë.
