Tragjedi familjare në Prizren: Babai ther për vdekje vajzën 15-vjeçare, plagos rëndë gruan dhe vajzën tjetër
Një ngjarje e rëndë ka tronditur mëngjesin e sotëm qytetin e Prizrenit, ku një burrë ka sulmuar me thikë anëtarët e familjes së tij, duke i shkaktuar vdekjen vajzës së tij 15-vjeçare dhe duke plagosur rëndë gruan dhe vajzën tjetër 10-vjeçare.
Lajmi është konfirmuar nga zëdhënësi i Policisë së Kosovës, Shaqir Bytyçi, i cili bëri të ditur se rasti është raportuar rreth orës 06:00 të mëngjesit në rrugën “Shotë Galica”.
“Policia është ndalur në vendin e ngjarjes, ku ka parë tri persona të lënduar, dhe njëra nga të lënduarat ka ndërruar jetë”, tha Bytyçi për Telegrafin.
Sipas tij, dyshohet se burri ka therur me thikë gruan dhe dy vajzat e tij. Vajza 15-vjeçare nuk ka arritur t’i mbijetojë plagëve, ndërsa vajza tjetër 10-vjeçare ndodhet në gjendje të rëndë shëndetësore dhe është dërguar me urgjencë në spital.
Policia ka nisur hetimet për zbardhjen e plotë të rrethanave të kësaj ngjarjeje tragjike. Autori i dyshuar është arrestuar dhe ndodhet në paraburgim.
Ngjarja ka shkaktuar reagime të forta dhe tronditje të thellë në opinionin publik.
