Stuhi e fortë godet Shqipërinë, probleme në disa qytete dhe vonesa në fluturime
Shqipëria është përfshirë gjatë ditës së sotme nga një stuhi e fuqishme e shoqëruar me reshje të dendura shiu, erëra të forta dhe mjegull, duke shkaktuar probleme të shumta në disa qytete të vendit.
Në Tiranë, stuhia ka rrëzuar disa pemë në zona të ndryshme të kryeqytetit, mes tyre te ish-stacioni i Trenit, Shkolla e Bashkuar dhe Oxhaku. Për pasojë, disa akse rrugore janë bllokuar përkohësisht, ndërsa era ka shpërndarë mbeturina, duke vështirësuar qarkullimin dhe lëvizjen e qytetarëve.
Situata e motit ka ndikuar edhe në Aeroportin Ndërkombëtar të Rinasit, ku fluturimet janë shoqëruar me vonesa dhe anulime. Të paktën 11 avionë mbërritjeje nga qytete të ndryshme evropiane, përfshirë Romën, Milanon, Parisin, Vjenën, Frankfurtin dhe Zyrihun, janë shtyrë, ndërsa dy linja ajrore drejt Pescara-s dhe Hamburgut janë anuluar.
Në Vlorë, era e fortë ka shkaktuar një stuhi rëre që ka mbuluar qytetin bregdetar. Pamjet tregojnë rrugë të mbushura me pluhur dhe dukshmëri të ulët, ndërkohë që pushuesit janë larguar me nxitim, duke krijuar trafik të rënduar në akset hyrëse dhe dalëse të qytetit.
Edhe Durrësi është përfshirë nga reshje të dendura shiu dhe erëra të fuqishme, të cilat kanë shkaktuar rrëzimin e pemëve dhe pengesa në qarkullimin rrugor. Ndërkohë në Lezhë, reshjet intensive kanë sjellë përmbytje rrugësh, duke krijuar vështirësi në lëvizjen e automjeteve.
Autoritetet u bëjnë thirrje qytetarëve të tregojnë kujdes në lëvizje dhe të shmangin zonat problematike deri në normalizimin e situatës.
